Mga Panan-awon ni Juan

Samtang gipriso si apostol Juan didto sa isla sa Patmos, gipakitaan siya ni Jesus ug 16 ka panan-awon, o mga hulagway, sa umaabot. Kini nga mga panan-awon nagpakita kon sa unsang paagi balaanon ang ngalan ni Jehova, moabot ang iyang Gingharian, ug matuman ang iyang kabubut-on dinhi sa yuta ug sa langit.

Sa usa ka panan-awon, nakita ni Juan si Jehova nga naglingkod sa Iyang halangdong trono sa langit. Gipalibotan si Jehova sa 24 ka ansiyano nga nagsul-ob ug puti ug may koronang bulawan. Dihay mga kilat ug dalugdog gikan sa trono. Dayon ang 24 ka ansiyano mihapa ug misimba kang Jehova. Sa laing panan-awon, nakita ni Juan ang dakong panon gikan sa tanang nasod, katawhan, ug pinulongan, nga nagsimba kang Jehova. Unya ang Kordero nga si Jesus, mao ang nagbantay ug naggiya nila ngadto sa mga tubig sa kinabuhi. Sa ulahi, diha sa laing panan-awon, si Jesus naghari sa langit kauban ang 24 ka ansiyano. Sa sunod nga panan-awon, nakita ni Juan si Jesus nga nakiggubat sa dragon nga si Satanas ug sa iyang mga demonyo. Gipalayas sila ni Jesus sa langit ug gitambog sa yuta.

Dayon nakita ni Juan ang nindot nga hulagway sa Kordero ug sa 144,000 nga nagtindog sa Bukid sa Zion. Iya sab nga nakita ang usa ka anghel nga naglupad libot sa yuta. Gisultihan niini ang mga tawo nga kahadlokan ang Diyos ug himayaon Siya.

Sa sunod nga panan-awon, iyang nakita ang gubat sa Armagedon. Sa maong gubat, gilaglag ni Jesus ug sa iyang mga kauban ang daotang sistema ni Satanas. Sa kataposang panan-awon, nakita ni Juan nga duna nay panaghiusa sa langit ug sa yuta. Si Satanas ug ang tanang dapig niya nawala na. Gibalaan sa tanang naa sa langit ug sa yuta ang ngalan ni Jehova, ug siya lamang ang ilang gisimba.