ABISAG

Usa ka batan-ong ulay gikan sa lungsod sa Sunem, sa A sa Jezreel ug sa Bukid sa Gilboa, sa teritoryo sa Isacar. (Jos 19:17-23) Siya “hilabihan ka tahom” ug gipili sa mga alagad ni David aron mahimong tig-alima ug kauban sa hari sa panahon sa iyang ulahing mga adlaw.​—1Ha 1:1-4.

Niadtong tungora si David mga 70 anyos na (2Sa 5:​4, 5), ug tungod sa kaluyahon diyutay na lang ang kainit sa iyang lawas. Si Abisag nagbantay kaniya sa maadlaw, nga sa walay duhaduha nagpadan-ag sa palibot pinaagi sa iyang batan-ong kalunhaw ug katahom, ug sa magabii siya ‘mohigda sa sabakan sa hari’ aron sa paghatag ug kainit kaniya, apan “ang hari wala makigdulog kaniya.” Bisan pa niana, ang tinamdan nga gipadayag sa ulahi ni Solomon labot kaniya nagpakita nga si Abisag giisip ingong asawa o puyopuyo ni David. Sa ingon, sumala sa lagda sa karaang Sidlakan, si Abisag mapanag-iya sa manununod ni David sa panahon sa iyang kamatayon.

Ang asoy mahitungod kang Abisag gisundan dayon sa asoy bahin sa pagsulay sa pag-ilog sa purongpurong pinaagi sa usa nga lagmit mao ang buhing kamagulangang anak nga lalaki ni David, si Adonias, ug mopatim-awng ingon niini ang paghan-ay aron masabtan ang sunod nga gibuhat ni Adonias sa panahon sa paghari ni Solomon. Si Solomon, human makalingkod sa trono, naghatag kang Adonias ug usa ka kondisyonal nga pasaylo. Unya si Adonias nagkombinsir sa inahan ni Solomon, si Bat-seba, nga hangyoon si Solomon nga ihatag kaniya si Abisag ingong iyang asawa. Si Solomon, nga nagtuo gayod nga ang hangyo ni Adonias maoy dili tungod lamang sa katahom ni Abisag kondili nagpadayag hinuon ug usa ka malalangong paningkamot sa pagpalig-on sa pag-angkon ni Adonias sa trono, nasuko pag-ayo, nagbakwi sa pasaylo nga gihatag kang Adonias ug nagsugo nga siya patyon. (1Ha 2:13-25) Wala na hisgoti pa si Abisag, apan lagmit nga siya nahimong usa sa mga asawa o puyopuyo ni Solomon.​—Tan-awa ang ADONIAS Num. 1.