ADRAMITO

Usa ka dunggoanang siyudad sa Dagat Aegean nga nahimutang sa Misia sa AK nga bahin sa Asia Minor, sa A sa Pergamo. Diha sa modernong Turkey, ang ngalan sa ilayang lungsod sa Edremit (sa S sa dunggoanan) maoy nagpreserbar sa kanhing ngalan niini.

Ang Adramito maoy bahin sa lalawigan sa Asia ilalom sa pagmando sa Roma ug lagmit nga sa usa ka panahon maoy usa ka ilado kaayong sentro sa patigayon sa kadagatan, sanglit kini nahimutang sa Romanhong dalan nga molatas sa Pergamo ug Efeso dapit sa H ug sa Asos, Troas, ug Hellespont dapit sa K ug sa A. Lagmit nga si Pablo miagi sa Adramito panahon sa iyang ikatulong misyonaryong panaw. Hinuon, kining dapita direktang gihisgotan sa Bibliya diha lamang sa Buhat 27:2. Didto sa Cesarea, si Pablo, ingong usa ka binilanggo nga binantayan sa Romanong opisyal nga si Julio, misakay ug barko nga maglawigan gikan sa Adramito paingon sa mga dapit ubay sa kabaybayonan sa Asia Minor. Ang grupo ni Pablo mikawas sa maong barko didto sa Mira sa Licia ug mibalhin ug sakay sa usa ka barkong tigkarga ug mga lugas nga molawig paingon sa Italya gikan sa Alejandria.​—Buh 27:3-6.