ADRIA

Gihisgotan sa Buhat 27:27 ang “dagat sa Adria,” diin si Pablo nakasinatig unos sulod sa 14 ka adlaw una pa malunod ang barko nga iyang gisakyan duol sa pulo sa Malta. Si Strabo nag-ingon nga kining ngalana naggikan sa ngalan sa siyudad sa Atria, nga nahimutang sa bokana sa Suba sa Po diha sa gitawag karong adlawa nga Gulpo sa Venice. (Geography, 5, I, 8) Ang presenteng siyudad sa Adria sa Italya medyo layolayo sa baybayon. Mopatim-aw nga ang Adria maoy gingalan sa katubigan nianang dapita ug sa ngadtongadto naglakip sa tibuok presenteng Dagat Adriatiko, Dagat sa Ionia, ug sa katubigan sa Mediteranyo sa S sa Sicilia (ug Malta) ug sa K sa Creta. Busa kini nga ngalan naglangkob sa ubang katubigan nga giisip karong adlawa nga anaa sa gawas sa Dagat Adriatiko; apan sa adlaw ni Pablo ang pulo sa Malta tukmang ikaingon nga gilibotan sa “dagat sa Adria.”