ADRIEL

Ang anak nga lalaki ni Barzilai, gikan sa siyudad sa Abel-mehola.

Gihatag kang Adriel ang kamagulangang anak nga babaye ni Saul nga si Merab ingong asawa, bisag siya gikasaad na ngadto kang David. (1Sa 18:17-19) Ang tanang lima ka anak nga lalaki ni Adriel sa ulahi gitugyan aron patyon aron makatabang sa pagbayad sa sala ni Saul sa iyang pagsulay nga puohon ang mga Gabaonhon. (2Sa 21:​8, 9) Niini nga asoy si Mikal inay nga si Merab ang gihisgotan ingong ang inahan sa lima ka anak nga lalaki ni Adriel. Sanglit si Mikal namatay nga walay anak (2Sa 6:23) ug wala hisgoti sa ubang mga teksto nga siya nahimong asawa ni Adriel, gilantaw sa ubang mga maghuhubad nga ang paglutaw sa ngalang Mikal maoy sayop sa mga magkokopya. Apan, halos ang tanang Hebreohanong mga manuskrito naggamit sa ngalang Mikal, ug ang pagpatin-aw nga gihatag sa tradisyon mao nga si Merab, ang magulang ni Mikal, sayo nga namatay human matawo ang lima ka anak nga lalaki ni Adriel ug human niadto si Mikal ang nagpadako sa lima ka batang lalaki sa iyang igsoon, busa gihisgotan sila ingong iyang mga anak nga lalaki. Ang hubad ni Isaac Leeser sa 2 Samuel 21:8 mabasa: “Ug ang lima ka anak nga lalaki ni Mikal nga anak nga babaye ni Saul, nga iyang gipadako alang kang Adriel.”