ENON

Usa ka dapit nga may “daghang tubig,” diin si Juan nga Tigbawtismo namawtismo human sa Paskuwa sa 30 K.P. (Ju 3:23) Haduol kini sa lagmit mas ilado nga dapit nga ginganlan ug Salim. Ang tukmang nahimutangan niining mga dapita dili matino; apan, si Eusebius nga obispo sa Cesarea nga nagkinabuhi niadtong ikatulo ug ikaupat nga siglo K.P., nagpunting sa usa ka dapit sa Walog sa Jordan nga mga 8 ka Romanhong milya (12 km; 7.5 mi) sa H sa Bet-sean. Niini nga dapit nahimutang ang Tell Ridgha (Tel Shalem), nga gituohang lagmit mao ang Salim. Sa haduol adunay ubay-ubayng mga tubod nga hayan mohaom sa gihubit ni Eusebius bahin sa dapit nga gitawag ug Enon.