AGATA

Usa ka bililhong pahiyas nga bato nga usa ka matang sa kalsidonya, usa ka klase sa dekolor nga kuwarso.

Kadaghanan sa mga agata maoy linginong mga deposito sa silica nga makaplagan sa mga lungag sa mga bato. Ang mga lut-od sa agata nagkalainlain gikan sa tin-aw ngadto sa dili sihag, ug kini mopabanaag ug daghang kolor tungod sa gigming nga mga partikulo sa iron salt. Ang mga kolor maoy kombinasyon sa dalag, kape, abohon, asul, o itom, ug kini lukop nga makita ingong nindot nga mga budlis, mga paliyok, o lubog nga kombinasyon sa mga kolor. Ang agata mas gahi ug diyutay kay sa asero ug mahimong pasinawon pag-ayo.

Ang agata nga gigamit sa mga Israelinhon didto sa kamingawan lagmit naggikan sa Ehipto. Sumala kang Pliny nga Magulang, ang pula nga mga agata nga may puting ugat-ugat nakaplagan kanhi sa palibot sa Thebes. Malagmit nga kining matanga sa pula nga agata mao ang gibutang diha sa “tabon sa dughan sa paghukom” sa hataas nga saserdote aron maghawas sa usa sa 12 ka tribo sa Israel. Ang bato sa tunga sa ikatulong laray diha sa tabon sa dughan ni Aaron maoy usa ka agata (Heb., shevohʹ, usa ka matang sa bililhong bato).​—Ex 28:​2, 15, 19 (ftn sa Rbi8), 21; 39:12.