AHAVA

Ang gingalan sa usa ka suba o kanal, ingon man sa usa ka kasikbit nga dapit nga nahimutang sa Babilonya, sa AK sa siyudad sa Babilonya, diin gitigom ni Esdras ang pipila ka Hudiyo ug nagpuasa sa wala pa mopanaw paingon sa Jerusalem. (Esd 8:​15, 21, 31) Dayag nga usa kadto ka panaw nga mga walo o siyam ka adlaw gikan sa Babilonya. (Itandi ang Esd 7:9; 8:​15, 31.) Si Herodotus (I, 179) naghisgot sa usa ka gamayng suba nga ginganlan ug Is, nga nag-agos ngadto sa Euprates, ug nag-ingon nga ang siyudad sa Is nga duol niining subaa maoy mga walo ka adlaw nga panaw gikan sa Babilonya. Gituohan nga mao kini ang modernong Hit, ug gisugyot sa pipila nga lagmit mao kini ang dapit sa Ahava.

Mahitungod sa lungsod sa Hit, ang The New Encyclopædia Britannica (1987, Tomo 5, p. 949) nag-ingon: “Duol sa Suba sa Euprates, ang Hit maoy usa ka gamayng pinarilan nga lungsod nga gitukod sa ibabaw sa duha ka bungdo nga nahimutangan sa usa ka karaang siyudad; ang kasikbit nga mga tinubdan sa aspalto gigamit sa labing menos 3,000 na ka tuig ug gigamit sa pagtukod sa Babilonya.” Kini nga tinubdan sa aspalto mosibo sa asoy sa Bibliya bahin sa pagtukod sa Torre sa Babel, diin ang aspalto nagsilbing argamasa.​—Gen 11:3.