AMARIAS

[Si Jehova Nag-ingon].

1. Usa ka saserdotehanong kaliwat ni Eleasar nga anak nga lalaki ni Aaron pinaagi kang Pinehas; anak nga lalaki ni Meraiot; amahan ni Ahitub; apohan ni Zadok nga nag-alagad ingong segundaryong saserdote panahon sa paghari ni David ug ingong hataas nga saserdote panahon sa paghari ni Solomon. (1Cr 6:​7, 52) Dili matino kon si Amarias nag-alagad ba ingong hataas nga saserdote, sanglit ang maong katungdanan temporaryo man nga gibalhin ngadto sa balay ni Eli nianang mga panahona.

2. Usa ka Levihanong kaliwat ni Hebron nga anak nga lalaki ni Kohat, kinsa gitala nga lakip sa pag-organisar pag-usab ni David sa buluhaton sa templo.​—1Cr 23:​1, 12, 19; 24:23.

3. Ang pangulong saserdote “alang sa matag butang ni Jehova,” ilabina sa legal nga mga kaso, sa panahon sa paghari ni Jehosapat.​—2Cr 19:11.

4. Lain pang kaliwat ni Eleasar nga nagkinabuhi sa ulahi pang panahon kay sa Num. 1. Anak nga lalaki ni Azarias ug amahan sa lain pang Ahitub.​—1Cr 6:11; Esd 7:3.

5. Usa ka Levihanon nga mitabang sa pag-apod-apod sa mga ikapulo ngadto sa mga saserdote diha sa ilang mga siyudad sa panahon sa paghari ni Ezequias.​—2Cr 31:​14, 15.

6. Anak nga lalaki ni Ezequias (lagmit ang hari sa Juda) ug apohan-sa-tuhod ni manalagnang Sofonias.​—Sof 1:1.

7. Usa sa pangunang mga saserdote nga mibalik gikan sa Babilonya kauban ni Zorobabel niadtong 537 W.K.P. (Neh 12:​1, 2, 7) Sa mga adlaw ni Gobernador Nehemias dihay usa ka ‘balay sa amahan’ nga gilangkoban sa mga saserdote nga gitawag sumala sa iyang ngalan.​—Neh 12:​12, 13, 26.

8. Usa ka kaliwat ni Binui; usa niadtong nagpapahawa sa ilang paganong mga asawa ug mga anak sa mga adlaw ni Esdras.​—Esd 10:10-12, 38, 42, 44.

9. Usa ka saserdote, o ang katigulangan sa usa nga nagpamatuod sa “kasaligang kontrata” sa panahon sa pagkagobernador ni Nehemias. (Neh 9:38; 10:​1, 3) Lagmit nga siya kapin na sa 112 anyos kon siya mao ra usab ang Num. 7.

10. Katigulangan sa mga molupyo sa Jerusalem sa panahon ni Nehemias; sa tribo ni Juda.​—Neh 11:4.