AMNON

[Kasaligan; Matinumanon; Malungtaron].

1. Panganayng anak nga lalaki ni David pinaagi kang Ahinoam nga Jezreelinhon, natawo sa Hebron.​—2Sa 3:2; 1Cr 3:1.

Si Amnon naibog pag-ayo sa matahom nga si Tamar, ang igsoong babaye ni Absalom, nga tungod niana siya nagmasakiton tungod sa gugma. Sa pagsunod sa tambag ni Jehonadab nga iyang ig-agaw, si Amnon nagpasakitsakit ug nag-aghat kang Haring David nga ipadala si Tamar ngadto sa kaugalingong puloy-anan ni Amnon aron magluto ug “tinapay sa paghupay” diha sa iyang atubangan. Dayon iyang gipahimuslan ang higayon sa pag-among-among sa iyang igsoon sa amahan bisan pa sa pagpakiluoy ug pagpangatarongan ni Tamar kaniya. Ang iyang gibuhat nagpakita kon unsa ka grabe ang sangpotan sa hakog nga erotikong gugma, kay sa dihang natagbaw na ang iyang kaibog, giabog ni Amnon si Tamar ngadto sa dalan ingong usa nga makaluod alang kaniya, kansang presensiya tino nga nagpabati kaniya nga mahugaw.​—2Sa 13:1-19.

Tungod sa iyang gibuhat, ang pursoso nga igsoong lalaki ni Tamar nga si Absalom naghambin ug pagdumot kang Amnon, ug duha ka tuig sa ulahi, sa usa ka kapistahan sa pag-alot sa karnero, gipapatay ni Absalom sa iyang mga sulugoon si Amnon sa dihang siya ‘nagmalipayon na tungod sa bino.’ (2Sa 13:20-29) Sanglit si Amnon, ingong panganayng anak nga lalaki ni David, mao ang dayag nga manununod sa trono, mahimong hunahunaon usab nga ang iyang kamatayon tinguhaon ni Absalom aron mas mahiduol kaniya ang posibilidad nga mabatonan ang pagkahari. Pinaagi niini nga panghitabo, ang tagna ni Natan human makahimog daotang paggawi si David sa asawa ni Urias nagsugod pagkatuman.​—2Sa 12:10; tan-awa ang ABSALOM.

2. Ang una sa listahan sa upat ka anak nga lalaki ni Shimon, sa tribo ni Juda.​—1Cr 4:​1, 20.