ASRIEL

Usa ka lalaking kaliwat ni Manases nga nahimong pangulo sa banay sa mga Asrielnon. Ang Numeros 26:29-31 nagpakita nga siya mao ang apo-sa-tuhod ni Manases pinaagi kang Makir ug sa iyang anak nga lalaki nga si Gilead. Sumala sa 1 Cronicas 7:​14, si Asriel mao ang anak nga lalaki ni Manases nga gipanganak sa iyang Siryanhong puyopuyo. Apan ang mosunod, nga lagmit bahin sa usa ka sinal-ot nga mga pulong, mabasa: “Siya nanganak kang Makir nga amahan ni Gilead.” Busa, sama sa kasagarang mabasa diha sa Biblikanhong mga talaan sa kagikan, si Asriel dinhi tingali matawag nga usa ka “anak nga lalaki” ni Manases sa diwa lamang ingong usa sa iyang ulahing mga kaliwat (pinaagi kang Makir nga anak nga lalaki ni Manases pinaagi sa iyang Siryanhong puyopuyo). Apan posible nga si Manases may pursosong anak nga lalaki ug usa ka apo-sa-tuhod nga lalaki nga nagbaton sa samang ngalan. Ang “mga anak nga lalaki ni Asriel” maoy mga kaliwat ni Manases kinsa gihatagan ni Josue ug mga pahat sa teritoryo sa Yutang Saad.​—Jos 17:1-4.