BAANA

1. Anak nga lalaki ni Rimon nga Benjaminhon. Siya ug ang iyang igsoong lalaki nga si Rekab maoy mga pangulo sa pundok sa mga bandido nga iya ni Is-boset nga anak nga lalaki ni Saul. Si Baana ug ang iyang igsoon nagbuno kang Is-boset samtang siya mitagpilaw sa kaudtohon, apan sa dihang ilang gidala ang iyang ulo ngadto kang David, kinsa bag-o lang gipalingkod ingong hari, gimando ni David nga pamatyon sila, giputol ang ilang mga kamot ug mga tiil, ug gibitay sila sa daplin sa linaw sa Hebron.​—2Sa 4:2-12.

2. Usa ka Netopahanon ug amahan sa usa sa gamhanang mga tawo ni David nga si Heleb (Heled).​—2Sa 23:29; 1Cr 11:30.

3. Usa sa 12 ka luyoluyo nga gitudlo ni Solomon sa pagtaganag pagkaon alang sa panimalay sa hari. Ang asaynment ni Baana mao ang ikalima nga gitalang distrito, sa panguna ang tabunok nga mga walog sa Megido ug Jezreel. Anak nga lalaki ni Ahilud; lagmit ang igsoon ni Jehosapat nga tigtala ni Solomon.​—1Ha 4:​3, 7, 12.

4. Usa pa sa 12 ka luyoluyo nga tigtagana ug pagkaon ni Solomon nga responsable sa ikasiyam nga gitalang distrito sa amihanang Palestina. Anak nga lalaki ni Husai nga higala ni David.​—1Ha 4:​7, 16; 2Sa 15:32-37.

5. Lagmit usa ka pangulo niadtong namalik gikan sa pagkadestiyero sa Babilonya kauban ni Zorobabel.​—Esd 2:2; Neh 7:7.

6. Usa sa “mga pangulo sa katawhan” kansang kaliwat, kon dili man siya mismo, nagpamatuod sa “kasaligang kontrata” ni Nehemias. (Neh 9:38; 10:​14, 27) Siya lagmit mao ra ang Num. 5.

7. Amahan ni Zadok nga mitabang kang Nehemias sa pag-ayo sa mga paril sa Jerusalem niadtong 455 W.K.P.​—Neh 3:​3, 4.