BAASA

Ikatulong hari sa napulo-ka-tribong gingharian sa Israel; anak nga lalaki ni Ahias sa tribo ni Isacar ug dili ilado ang kagikan. Giilog niya ang trono pinaagi sa pagpatay sa gisundan niya sa paghari nga si Nadab, nga human niana iyang gipatay ang tibuok banay ni Jeroboam sumala sa gitagna. (1Ha 15:27-30; 14:10) Apan, gipadayon ni Baasa ang gibuhat ni Jeroboam nga pagsimba sa nating baka, ug tungod niana ang kalaglagan gitagna usab batok sa iyang kaugalingong banay. (1Ha 16:1-4) Sa dihang siya nakiggubat batok sa Juda, giawhag ni Asa ang hari sa Sirya nga hasion si Baasa gikan sa A. Unya giguba ni Asa ang gipalig-on nga siyudad sa Rama nga gitukod ni Baasa. (1Ha 15:16-22; 2Cr 16:1-6; tan-awa ang ASA Num. 1 [Ang Daotang Laraw ug ang Pagpakiggubat Batok Kang Baasa].) Human magmando gikan sa mga 975 hangtod sa 953 W.K.P., si Baasa namatay ug gilubong didto sa iyang kaulohan sa Tirza. Ang iyang anak nga lalaki nga si Elah nahimong hari niadtong ika-26 nga tuig ni Asa nga hari sa Juda (1Ha 16:8), apan sa ika-27 nga tuig ni Asa (1Ha 16:15) si Zimri mialsa ug gipapas ang banay ni Baasa ingong katumanan sa gimbut-an ni Jehova.