GAYTA

Bisan tuod ang Aramaikong pulong nga sum·pon·yahʹ, nga makita sa Daniel 3:​5, 10, 15, gihubad nga “dulcimer” (usa ka kinuldasan nga tulonggon) (KJ, Kx) ug “simponiya” (Dy, Yg), ang modernong mga hubad sa Bibliya sa kadaghanan naghubad niini nga ekspresyon ingong “gayta.” Ang Lexicon in Veteris Testamenti Libros ni Koehler ug Baumgartner naghatag sa kahulogang “gayta.”​—Leiden, 1958, p. 1103.

Ang sum·pon·yahʹ lagmit kaamgid sa yanong mga gayta sa Sidlakan karong adlawa. Ang sirado kaayong bag nga gamiton alang sa gayta maoy ginama gikan sa panit sa kanding, nga wala ilakip ang mga tiil, ikog, o ulo, apan sagad nga may mga balhibo pa. Ang usa ka tubo nga gamiton aron kasudlan ug hangin ang bag sa gayta isuksok ngadto niini ug ingon man usab ang samag-plawta nga mga tubo nga hinimo gikan sa mga tangbo ug sa mga tumoy sa mga sungay sa mga baka.