BILHA

1. Usa sa mga sulugoong babaye sa panimalay ni Laban nga iyang gihatag sa iyang anak nga babayeng si Raquel ingong iyang sulugoon sa dihang siya naminyo kang Jacob. (Gen 29:29) Nahitabo kadto sa Padan-aram, nga nahimutang sa patag sa ibabaw sa bukid sa amihanang rehiyon sa Mesopotamia. Sa paglabay sa panahon, sa dihang si Raquel apuli pa gihapon, iyang gihatag si Bilha kang Jacob ingong segundaryong asawa, aron nga pinaagi sa iyang sulugoong babaye si Raquel makabatog mga anak, sama sa gihimo ni Sara. (Gen 16:2) Niining paagiha si Bilha nakabaton sa pribilehiyo nga mahimong inahan sa duha ka anak nga lalaki, si Dan ug Neptali, kansang mga kaliwat naglangkob ug 2 sa 12 ka tribo sa Israel. (Gen 30:3-8; 35:25; 1Cr 7:13) Sa dihang mipauli si Jacob sa yuta sa Canaan, si Bilha, kauban sa iyang mga anak, personal nga gipailaila kang Esau nga kaluhang igsoon ni Jacob. Human mamatay si Raquel, ang kamagulangang anak nga lalaki ni Jacob, si Ruben, nakighilawas kang Bilha.​—Gen 35:22; 49:​3, 4.

2. Usa ka lungsod nga sakop sa tribo ni Simeon nga nahimutang sa rehiyon sa Negeb sa Juda (1Cr 4:29), dayag nga mao ra ang Baala sa Josue 15:29.