BALAY-HIGTANAN SA MGA MAGBALANTAY SA KARNERO

Usa ka dapit diha sa dalan gikan sa Jezreel paingon sa Samaria diin, duol sa usa ka atabay, nahibalag ug gipamatay ni Jehu ang mga igsoong lalaki ni Haring Ahazias sa Juda. (2Ha 10:12-14) Ang ngalan niini lagmit nagpasabot sa usa ka balay diin didto gihigot ang mga karnero aron kini daling maalotan. Ang pipila ka bersiyon naghubad sa behth-ʽeʹqedh ingong “balay tagboanan,” nga nagpasabot sa usa ka abtanan diin “ang mga magbalantay sa karnero” (ha·ro·ʽimʹ) magtagbo; ang uban naghatag lamang ug katumbas nga espeling sa maong Hebreohanong ngalan, nga nag-isip niini ingong ngalan sa usa ka lungsod. Gituohan sa kadaghanan nga kini mao ang Beit Qad (Bet Qad) nga mga 6 km (3.5 mi) sa SAS sa modernong Jenin. Adunay daghang atabay niining dapita.