BIRZAIT

Usa ka ngalan diha sa talaan sa mga kaliwat ni Aser sa banay ni Malkiel. (1Cr 7:​30, 31) Tungod kay ang Birzait mao lamang ang ngalan sa mga gitala sa 1 Cronicas 7:​30, 31 nga dili makaplagan sa samang talaan sa kagikan sa Genesis 46:​17, gituohan sa pipila nga ang Birzait nagtumong sa usa ka dapit diin nagpuyo diha niini ang mga kaliwat ni Malkiel, o gihunahuna nila nga kini maoy usa ka dapit diin si Malkiel ang pangunang molupyo, maingon nga si Sobal gihisgotan ingong “ang amahan ni Kiriat-jearim” ug si Salma ingong “ang amahan ni Betlehem.” (1Cr 2:​51, 52) Sanglit gihunahuna man nga ang Birzait maoy ngalan sa usa ka dapit, gituohan sa pipila nga mao kini ang Birzeit, mga 21 km (13 mi) sa AAK sa Jerusalem; apan, bisan pa sa kaamgiran sa maong mga ngalan, ang nahimutangan sa Birzeit nga duol sa habagatang utlanan sa Epraim (inay nga sa teritoryo sa Aser) wala magpaluyo nga kini mao ang Birzait.