KAPITAN SA TEMPLO

Ang opisyal, ikaduha sa hataas nga saserdote labot sa dignidad (Buh 4:1), nga tagdumala sa nag-alagad nga mga saserdote ug mga Levihanon nga giorganisar ilalom sa mas ubos nga mga kapitan aron sa pagbantay sa templo sa Jerusalem ug sa paghupot sa kahapsay. (Luc 22:​4, 52) Dihay 24 ka dibisyon sa mga Levihanon ug ang matag dibisyon magrelibohay sa pag-alagad tagsa ka semana, kaduha sa usa ka tuig. Ang matag dibisyon lagmit usab nga adunay usa ka kapitan, nga may ubay-ubayng mga kapitan sa gagmayng mga grupo.

Ang mga kapitan maoy mga tawong impluwensiyado. Sila nakigkunsabo sa pangulong mga saserdote sa pagsuhol kang Judas aron budhian si Jesus. Ilang gidala ang ilang kasundalohan uban sa mga saserdote aron sa pagdakop kang Jesus. (Luc 22:​3, 4, 52) Ang kapitan sa templo mao ang nag-awtorisar sa pagdakop kang Pedro ug Juan didto sa templo. (Buh 4:​1, 3) Sa ulahing okasyon, human si Pedro ug ang pipila sa mga apostoles gipagawas gikan sa bilanggoan pinaagi sa usa ka manulonda, ang kapitan sa templo milakaw uban sa iyang mga polis aron dad-on sila nga malinawon atubangan sa Sanhedrin sa legal nga paagi.​—Buh 5:24-26.