CLOPAS

Ang bana sa usa sa mga Maria nga nagtindog duol kang Jesus sa dihang siya gibitay diha sa estaka sa pagsakit. (Ju 19:25) Lagmit siya mao ang bana sa “laing Maria,” ug amahan sa apostol nga si Santiago nga Gamay ug sa iyang igsoong lalaki nga si Joses. (Mat 27:56; 28:1; Mar 15:40; 16:1; Luc 24:10) Lagmit gayod ug giila sa kadaghanan nga si Clopas mao ra ang tawo nga gitawag ug Alfeo. (Mat 10:3; Mar 3:18; Luc 6:15; Buh 1:13) Ang duha ka ngalan tingali maoy lainlain nga paglitok sa lintunganayng pulong nga naggikan sa Aramaiko, o tingali ang maong tawo dunay duha ka ngalan nga baylobaylong gigamit, nga maoy kasagarang batasan nianang panahona. Ang pagtuo nga si Clopas usa ka igsoong lalaki ni Jose, ang amaama ni Jesus, maoy panaghap nga bug-os gipasukad sa tradisyon.