KULANTRO, LISO SA

[Heb., gadh].

Ang mana nga gikaon sa mga Israelinhon didto sa kamingawan giingong “puti sama sa liso sa kulantro” (Ex 16:31), lagmit kaamgid niini dili lamang sa kolor kondili sa kinatibuk-ang dagway usab.​—Num 11:7.

Ang kulantro (Coriandrum sativum) maoy usa ka tinuig nga tanom nga kapamilya sa karot o sa parsley, moabot sa gitas-on nga mga 40 hangtod sa 50 sm (16 hangtod sa 20 pul.), may samag parsley nga mga dahon ug mga pungpong sa bulak nga rosason o puti. Ang bunga niini may linginong mga liso nga abohong-puti ang kolor ug maoy 1 hangtod sa 3 mm (0.04 hangtod sa 0.12 pul.) ang diyametro. Kini nga mga liso adunay humot nga lana nga lamian ug gigamit nga lamas sa pagkaon, ug usab ingong tambal sa dili grabeng mga sakit sa tiyan.

Ang liso sa kulantro gigamit sa Ehipto sukad pa sa karaang mga panahon ug busa kini tinong nailhan gayod sa mga Israelinhon una pa ang Pagpanggula. Kini nanurok didto sa Ehipto ug sa Palestina.