INAGAS

Usa ka ekspresyon sa Bibliya nga gigamit labot sa kahimtang sa kinatawo sa mga lalaki ug babaye. (Lev 15:​2, 19, 25; Num 5:​2, 3; 2Sa 3:29) Sa kaso sa mga lalaki, kini nalangkit sa usa ka dili himsog nga kahimtang, diin adunay inagas gikan sa kinatawo o ang kinatawo nasampongan tungod niini. (Lev 15:​2, 3) Walay anak nga lalaki ni Aaron nga tugotang mokaon sa “balaang mga butang” samtang siya mahugaw tungod sa inagas.​—Lev 22:4.

Ang ekspresyon nga “inagas” usahay gigamit alang sa regular, normal nga pagregla sa babaye. (Lev 15:19-24) Apan kini gigamit usab sa pagpaila sa usa ka balatian diin padayon ang pag-agas sa dugo ug busa abnormal. (Lev 15:25-30) Kining ulahi nga diwa nagtumong sa padayong “pagtalinugo” nga niini nag-antos ang usa ka babaye sulod sa 12 ka tuig sa wala pa siya ayoha ni Jesu-Kristo.​—Mat 9:20-22.

Sumala sa Balaod, ang usa ka tawo nga may inagas maoy mahugaw, ang mga butang ug ang mga tawo nga iyang mahikapan mamahugaw, ug ang uban pa. Human ang usa ka balatian sa pag-agas motang-on, ang indibiduwal mohimog espesipikong mga lakang alang sa pagputli.​—Lev 15; tan-awa ang HINLO, PAGKAHINLO.