ELIASIB

[Ang Akong Diyos Nagbalik (Nagdala Pag-usab)].

1. Usa ka Levihanon gikan sa mga anak nga lalaki ni Aaron nga natungnan sa ripa sa ika-11 nga saserdotehanong dibisyon sa panahon ni David.​—1Cr 24:​1, 5, 6, 12.

2. Amahan sa usa ka Jehohanan.​—Esd 10:6.

3. Usa ka Levihanon nga mag-aawit sa templo nga lakip niadtong nagpapahawa sa ilang langyawng mga asawa sa panahon ni Esdras.​—Esd 10:​16, 17, 23, 24, 44.

4. Kaliwat ni Zatu nga lakip usab sa mga lalaking nagpapahawa sa ilang langyawng mga asawa.​—Esd 10:​16, 17, 27, 44.

5. Kaliwat ni Bani nga lakip usab niadtong nagpapahawa sa ilang langyawng mga asawa.​—Esd 10:​16, 17, 34, 36, 44.

6. Apo nga lalaki ni Jesua, kinsa mibalik uban kang Zorobabel gikan sa pagkadestiyero sa Babilonya. Si Eliasib maoy hataas nga saserdote sa mga adlaw ni Nehemias ug nakig-ambit sa uban pang mga saserdote sa pagtukod pag-usab sa Ganghaan sa Karnero sa paril sa Jerusalem. (Neh 12:​1, 10; 3:1) Sa dihang wala si Nehemias, gihugawan ni Eliasib ang templo pinaagi sa paghimo ug usa ka lawak-kan-anan diha sa sawang sa templo alang sa iyang paryente nga si Tobias nga Ammonhanon. Apan, sa iyang pagbalik, gisalibay ni Nehemias ang muwebles ni Tobias ug gipahinloan ang mga lawak-kan-anan. Giabog usab ni Nehemias ang usa sa mga anak nga lalaki ni Joiada nga anak nga lalaki ni Eliasib tungod sa iyang pagpakigminyo sa anak nga babaye ni Sanbalat nga Horonhon.​—Neh 13:​4, 5, 7-9, 28.

7. Anak nga lalaki ni Elioenai, usa ka kaliwat ni Haring David.​—1Cr 3:​1, 5, 10, 24.