PAGBORDA

Kini ang karaang pamaagi sa paggamit ug dagom sa pagtahi sa mga hilo o sa ubang mga materyales nga lainlain ug kolor o mga matang nganha sa usa ka matang sa panapton o panit aron sa paghimog pinaugdo nga dayandayan. Ang nagkalanggikit nga mga disenyo ug mga larawan nga giborda diha sa panapton unang gihisgotan sa Bibliya may kalabotan sa tabernakulo sa Israel. Ang mga artesano sa tabernakulo nga si Bezalel ug Oholiab gipuno ni Jehova sa kaalam sa kasingkasing aron sa paghimo, lakip sa ubang mga butang, sa tanang buluhaton sa usa ka tigborda, nga lahi sa buluhaton sa usa ka maghahabol.​—Ex 35:30-35; 38:21-23.

Sa pagsunod sa mga instruksiyon sa Diyos, ang mga kerubin giborda nga may kabatid diha sa mga tabil sa tolda sa tabernakulo, diin kini nga mga larawan makita diha sa sulod sa mga lawak sa Balaan ug sa Labing Balaan. (Ex 26:1; 36:8) Ang mga kerubin giborda usab diha sa kortina nga nag-ulang niini nga mga lawak sa tabernakulo.​—Ex 26:31-33; 36:35.

Sa paghimo sa epod nga gisul-ob sa hataas nga saserdote, gisalsal ang mga palid nga bulawan nga gihimong nigpis nga mga pligo, nga gitabastabas ingong mga hilo “aron ilakip paggama uban sa asul nga hilo ug sa balhibo sa karnero nga tininag morado ug sa hilo nga sanag-pula gikan sa coccus ug sa pino nga lino, ingong gama sa usa ka tigborda.” (Ex 39:​2, 3; 28:6) Sa susama, ang “gama sa usa ka tigborda” gilakip sa dihang gihimo ang “tabon sa dughan sa paghukom” sa hataas nga saserdote.​—Ex 28:15; 39:8.

Ang awit sa kadaogan ni Barak ug Debora naghulagway sa inahan ni Sisera ingong nagpaabot kaniya nga mahiuli gikan sa pagpakiggubat sa Israel dala ang mga inagaw sa gubat nga naglakip sa binordahan nga mga besti. (Huk 5:​1, 28, 30) Tungod sa gugma ni Jehova, mahulagwayon niyang gibestihan ang Jerusalem sa mahalong “binordahang besti.” Apan ang idolatrosong mga molupyo niini dayag nga migamit sa literal nga binordahang mga besti aron sa pagtabon sa mga larawan sa lalaki nga ngadto niini siya gihulagway nga namampam. (Eze 16:​1, 2, 10, 13, 17, 18) Gitagna usab ni Jehova pinaagi kang Ezequiel nga, sa pagkapukan sa adunahang Tiro diha sa mga kamot sa Babilonya, ang ‘mga pangulo sa dagat’ nga gipalagpot gikan sa trono ‘maghubo sa ilang binordahan nga mga besti.’​—Eze 26:​2, 7, 15, 16.