EMMAUS

Ang balangay nga gipadulngan ni Cleopas ug sa iyang kaubang tinun-an sa dihang sila gikuyogan sa nagmateryalisar nga si Jesu-Kristo sa adlaw sa iyang pagkabanhaw. Apan, ayha pa sila nakaila kang Jesus sa dihang sila nakaabot na sa Emmaus ug si Jesus “naghirag sa kan-anan kauban nila.” Human sa pagkawala ni Jesus ang duha ka tinun-an mibalik sa Jerusalem nianang gabhiona mismo. (Luc 24:13-33) Si Lucas nag-ingon nga ang maong balangay maoy ‘kan-uman ka stadia’ (7.5 ka Romanhong milya [11 km; 7 mi]) gikan sa Jerusalem.

Apan, ang nahimutangan karon sa Emmaus dili matino ug ubay-ubayng mga dapit ang gisugyot. Ang labing prominente niini mao ang ʽImwas nga nahimutang duol sa dalan paingon sa Tel Aviv-Yafo. Apan ang ʽImwas maoy mga 175 ka stadia (32 km; 20 mi) sa KAK sa maong siyudad, halos tulo ka pilo ang gilay-on sa gihisgotan ni Lucas. Ang laing gisugyot nga dapit, ang Qalunyah (Mevasseret Ziyyon), nga nahimutang duol sa pangunang dalan paingon sa Tel Aviv-Yafo ug gidawat sa pipila nga mao ang Ammaous nga gihisgotan ni Josephus, maoy mga 35 ka stadia (6.5 km; 4 mi) gikan sa Jerusalem ug busa duol ra kaayo aron mohaom sa girekord ni Lucas. Busa, gipalabi sa pipila nga ang Emmaus mao ang El-Qubeiba, diha sa mas amihanan nga bahin sa Romanhong dalan kay sa ubang gisugyot nga mga dapit. Dinhi may nakaplagang mga nahibilin nga gituohang sukad pa sa yugto sa Gregong Kasulatan. Ang lokasyon nga mga 60 ka stadia (11 km; 7 mi) sa AK sa Jerusalem, mopaluyo sa panglantaw nga tingali mao kini ang balangay diha sa Bibliya. Bisan pa niana, ang tukmang lokasyon niini imposibleng matino niining panahona.