FELIX
[gikan sa Lat., Malipayon].
Ang prokurador sa Romanhong lalawigan sa Judea kinsa nagbilanggo kang Pablo sulod sa duha ka tuig human sa kataposang pagduaw ni Pablo sa Jerusalem sa mga 56 K.P. Gipakita ni Tacitus nga si Felix duyog nga nangatungdanan uban kang Cumanus ingong prokurador sulod sa daghang katuigan ug human niana ingong bugtong nga prokurador sa Judea. (The Annals, XII, LIV) Wala hisgoti ni Josephus nga si Felix nangatungdanan sa samang panahon uban kang Cumanus, ug tungod niana ang kadaghanang eskolar nag-ingon nga si Felix nagsugod sa pag-alagad ingong prokurador niadtong 52 K.P. (Jewish Antiquities, XX, 137 [vii, 1]; The Jewish War, II, 247, 248 [xii, 8]) Bisan pa niana, tungod sa daghang katuigan sa pag-alagad ni Felix, si Pablo nakaingon bahin kaniya: “Sulod na karon sa daghang katuigan ikaw mao ang maghuhukom niining nasora.”—Buh 24:10.
Ang sekular nga mga historyador nag-ingon nga si Felix maoy usa ka ulipon kanhi, nga ang iyang ngalan maoy Antonius, nga siya ug ang iyang igsoong si Pallas gihatagan ni Emperador Claudio sa ilang kagawasan, ug nga siya maoy usa ka mabangis ug imoral nga opisyal. Gihubit siya ni Tacitus ingong usa nga “nagbuhat sa tanang matang sa kabangis ug kaulag, nga naggamit sa gahom sa hari uban ang tanang kinaiyahan sa usa ka ulipon.” (The Histories, V, IX) Giingon nga siya maoy nagpapatay sa Hataas nga Saserdoteng si Jonatan. Si Suetonius nag-ingon nga si Felix nahimong bana sa tulo ka rayna. (The Lives of the Caesars, Claudius, XXVIII) Ang maong kahubitan nahiuyon sa atong nasayran bahin kang Felix diha sa Bibliya.
Human dakpa si Pablo, si Claudio Lisias, ang Romanong komandante militar, kay nahadlok sa seguridad sa iyang binilanggo kon tugotang magpabilin sa Jerusalem, nagdali pagdala sa apostol nga binantayan pag-ayo ngadto sa Cesarea, nga “nagsugo sa mga magsusumbong nga mosulti batok kaniya” atubangan kang Felix. (Buh 23:23-30) Lima ka adlaw sa ulahi, ang Hataas nga Saserdoteng si Ananias, ang usa ka Tertulo, ug ang uban pa milugsong gikan sa Jerusalem dala ang dili-makataronganong mga sumbong batok kang Pablo. Si Felix mao ang nagdumala sa husay, nga naglangaylangay sa paghukom. Siya mimando nga itener si Pablo, apan luagan ug diyutay ang pagbantay kaniya, ug nga walay usa sa kaubanan ni Pablo ang did-an sa pag-atiman kaniya.—Buh 24:1-23.
Sa ulahi “gipasugoan [ni Felix] si Pablo ug siya namati kaniya bahin sa pagtuo kang Kristo Jesus.” Mao kadtong higayona, lagmit nga diha usab ang asawa ni Felix nga si Drusila, nga si Pablo “namulong bahin sa pagkamatarong ug pagpugong-sa-kaugalingon ug sa paghukom nga moabot.” Sa pagkadungog niining mga butanga “si Felix nalisang” ug gisultihan ang apostol: “Sa pagkakaron lakaw una, apan kon makahigayon na ako pasugoan ko ra ikaw pag-usab.” Sulod sa yugto nga duha ka tuig, si Felix subsob nga nagpasugo ug nakigkabildo kang Pablo, nga naglaom nga si Pablo maghatag kaniya ug salapi ingong hiphip alang sa iyang kagawasan, apan kini nakawang lamang.—Buh 24:24-27.
Gikayugtan pag-ayo sa mga Hudiyo ang administrasyon ni Felix. Lagmit niadtong 58 K.P. nga “gipulihan si Felix ni Porcio Festo; ug tungod kay si Felix nagtinguha man nga makabatog pabor sa mga Hudiyo, siya nagbilin kang Pablo nga ginapos.” (Buh 24:27) Apan, kining gibuhat ni Felix wala makaalim sa mga samad nga iyang nahimo sa mga Hudiyo; ni nakapugong kini kanila sa pagpadala ug delegasyon ngadto sa Roma aron isang-at ang ilang kaso batok kaniya. Ang iyang pagkalingkawas sa silot human gipabalik ngadto sa Roma maoy tungod lamang sa pinaborang posisyon ug impluwensiya nga nabatonan sa iyang igsoong si Pallas uban kang Nero.