SANTIK

Usa ka gahi kaayong bato, nga mas gahi pa sa asero, ug hilabihan ang kagahi niini nga kon ikadlit ang duha ka piraso niini kini makapatunghag kalayo. Sa mahulagwayong paagi, ang Bibliya naghisgot sa santik sa dihang gipasiugda niini ang mga hiyas sama sa kalig-on, pagkamalahutayon, ug pagkadili-matarog atubangan sa pagsupak.​—Isa 5:28; 50:7; Eze 3:9.

Ang santik makaplagan diha sa mga deposito sa anapog ug tisas didto sa Israel ug sa amihanan sa Peninsula sa Sinai. Kini daling malugti, ug kon matipak, kini sinaw kaayo. Ang mga tipak niini hait kaayog mga kilid, ug kini nakitang mapuslanon ug gigamit sa mga tawo. Sukad pa sa kakaraanan ang mga kutsilyo, atsa, tigib, bangkaw, pana, ug ang uban pang mga himan ug mga hinagiban gigama gikan niining batoha. Ang asawa ni Moises migamit ug santik sa pagtuli sa iyang anak; sa dihang ang nasod sa Israel miabot sa Gilgal malamposong gihimo ang susamang pagtuli ginamit ang santik nga mga kutsilyo. (Ex 4:25; Jos 4:19; 5:​2, 3, 8, 9) Si Jehova nagpagula ug tubig gikan sa bato nga santik alang sa iyang katawhan didto sa kamingawan.​—Deu 8:15; Sal 114:8.