APDO

Usa ka pluwido nga gipatungha sa atay ug gipondo diha sa putos sa apdo, usa ka gamay nga samag-peras nga putos nga nahimutang sa ilalom nga kilid sa tuong bahin sa atay. Ang putos sa apdo makapondo sa usa ka higayon ug mga 40 ml nga apdo. Kini maoy pait kaayo nga pluwido nga dalag o berdehon nga gigamit sa lawas aron sa paghilis. Ang apdo gilangkit sa mga butang nga mapait o makahilo, ug ingon niana ang paggamit sa maong pulong diha sa Bibliya.​—Buh 8:23.

Sa paghubit sa iyang masakit ug mapait nga kasinatian, si Job mahulagwayong naghisgot sa iyang apdo nga gibubo diha sa yuta. (Job 16:​1, 13) Sa ulahi, si Zopar, sa mahulagwayong pinulongan, pinasumbingay nga nag-akusar nga si Job may gibuhat nga daotan ug nga ang iyang “pagkaon” maanaa sa sulod kaniya sama sa “apdo [o hilo] sa mga kobra.” Siya nagpasidaan nga ang usa ka hinagiban “molagbas sa iyang [putos sa] apdo.” (Job 20:​1, 14, 25) Ang Hebreohanong pulong nga gihubad nga “apdo” nalangkit sa pulong alang sa “mapait.”​—Deu 32:32; Job 13:26.

Ang Gregong pulong alang sa apdo maoy kho·leʹ.​—Tan-awa ang MAKAHILO NGA TANOM.