GAMALIEL

[lagmit, Ganti (Nahiangayng Pagtagad) Gikan sa Diyos].

1. Ang anak nga lalaki ni Pedazur sa tribo ni Manases, ug ang pangulo sa iyang tribo. (Num 1:​10, 16) Si Gamaliel maoy usa sa 12 ka pangulo nga gitudlo ni Jehova aron motabang kang Moises ug Aaron sa pag-ihap sa mga anak sa Israel, gikan sa 20 anyos pataas, alang sa pagsundalo. (Num 1:1-4, 10) Siya ang nangulo sa panon sa iyang tribo, nga maoy bahin sa tulo-ka-tribo nga dibisyon sa kampo ni Epraim. (Num 2:​18, 20; 10:23) Human sa pagpatindog sa tabernakulo, ang mga pangulo mitanyag sa ilang mga halad nga gisugo ni Jehova aron magamit sa pag-alagad sa tolda nga tagboanan. Si Gamaliel mitanyag usab ug halad sa ikawalong adlaw alang sa inagurasyon sa halaran.​—Num 7:1-5, 10, 11, 54-59.

2. Usa ka membro sa Sanhedrin, usa ka Pariseo, ug usa ka magtutudlo sa Balaod, nga sa iyang tiilan natudloan si apostol Pablo sumala sa pagkaestrikto sa Balaod sa katigulangan. (Buh 5:34; 22:3) Gituohan sa kadaghanan nga si Gamaliel mao ra si Gamaliel nga Tigulang. Si Gamaliel nga Tigulang gitamod pag-ayo ingong mao ang unang gihatagan sa titulong “Rabban.” Kining dungganon nga titulo mas labaw pa gani kay sa “Rabbi.” Mahitungod kaniya ang Mishnah (Sotah 9:15) nag-ingon: “Sa dihang namatay si Rabban Gamaliel nga Tigulang, ang himaya sa Balaod natapos ug ang kaputli ug pagdili-sa-kaugalingon nahanaw.” (Gihubad ni H. Danby) Dayag nga si Gamaliel makataronganon ug dili panatiko sa iyang mga panglantaw, ingon sa gipakita sa tambag nga iyang gihatag sa panahon nga gidala si Pedro ug ang ubang mga apostoles atubangan sa Sanhedrin. Pinaagi sa pagpunting sa mga hitabo sa nangagi, gipakita ni Gamaliel nga maalamon nga dili manghilabot sa buluhaton sa mga apostoles ug dayon midugang: “Kon kining larawa o kining buhata gikan man sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila . . . basin baya hinuon nga makaplagan kamo nga mga kaaway diay sa Diyos.”​—Buh 5:34-39.