GERSONHON

[Kang (Iya ni) Gerson].

Ang mga kaliwat ni Gerson, o Gersom​—ang unang ginganlan sa tulo ka anak nga lalaki ni Levi​—pinaagi sa iyang duha ka anak nga lalaki nga si Libni ug Simei. (1Cr 6:​1, 16, 17) Ang mga Gersonhon maoy usa sa tulo ka dagkong mga dibisyon sa mga Levihanon. Sa unang pagsenso didto sa kamingawan, sila may gidaghanon nga 7,500 ka lalaki gikan sa usa ka bulan ang kagulangon pataas. Kadtong nag-edad ug 30 hangtod sa 50 anyos nga nag-alagad sa tabernakulo mikabat ug 2,630 ka lalaki. (Num 3:​21, 22; 4:38-41) Ang buluhaton sa mga Gersonhon didto sa kamingawan naglakip sa pag-atiman sa tabernakulo (ang tolda nga tagboanan), sa nagkalainlaing mga tabon niini, sa tabil sa ganghaan sa tabernakulo, sa mga kortina sa sawang, sa tabil sa ganghaan sa sawang, ug sa mga pisi sa tolda. (Num 3:23-26; 4:21-28; Ex 26:​1, 7, 14, 36; 27:​9, 16) Didto sa kampo sa kamingawan, ang ilang puwesto maoy dapit sa K nga kiliran sa tabernakulo. Sa likod nila, nga halayo sa tabernakulo, nagkampo ang tulo-ka-tribo nga dibisyon ni Epraim. (Num 3:23; 2:18) Sa dihang ang mga pangulo sa Israel mihatag ug 6 ka karomata nga may atop ug 12 ka torong baka alang sa pag-alagad sa tabernakulo, gihatag ni Moises ang 2 ka karomata ug 4 ka torong baka ngadto sa mga anak nga lalaki ni Gerson. (Num 7:1-7) Sa dihang mobalhin sa pagkampo, ang mga Gersonhon mopanaw uban sa mga Merarihanon nga gitaliwad-an sa nag-unang tulo-ka-tribo nga dibisyon ni Juda ug sa nagsunod nga tulo-ka-tribo nga dibisyon ni Ruben.​—Num 10:14-20.

Ang mga Gersonhon gipahatan ug 13 ka siyudad nga may mga sibsibanan diha sa mga teritoryo sa Manases, Isacar, Aser, ug Neptali. Ang Kedes sa Galilea ug ang Golan sa Basan, nga gipahat ngadto kanila, maoy duha sa unom ka siyudad nga dalangpanan sa nasod. (Jos 21:27-33) Sa dihang giorganisar pag-usab ni David ang mga Levihanon, ang responsibilidad maylabot sa pag-awit ug sa tipiganan sa bahandi maoy mga buluhaton nga gipiyal ngadto sa pipila ka Gersonhon. (1Cr 6:​31, 32, 39-43; 23:4-11; 26:​21, 22) Ang mga Gersonhon maoy lakip sa mga Levihanon nga miapil sa buluhaton sa paghinlo sa templo sa mga adlaw ni Haring Ezequias.​—2Cr 29:12-17.