GESEM

[lagmit, Kusog nga Ulan; Nagabunok nga Ulan].

Usa ka Arabiano kinsa, uban ni Sanbalat ug Tobias, misupak kang Nehemias sa pagtukod pag-usab sa paril sa Jerusalem. Sa sinugdan kini nga mga kaaway nagyubit kang Nehemias ug sa iyang mga kauban sa pagtrabaho. (Neh 2:19) Dayon sila nagkunsabo ug nagplanog daotan batok kang Nehemias, apan wala molampos. (Neh 6:1-4) Sa kataposan, si Sanbalat nagpadalag sulat kang Nehemias, nga nagkutlo sa akusasyon ni Gesem nga si Nehemias ug ang mga Hudiyo naglaraw sa pag-alsa ug nga si Nehemias nahimong hari kanila. Labot niini, kini nga mga kaaway sa gihapon napakyas. (Neh 6:5-7) Ang pagkutlo ni Sanbalat kang Gesem diha sa sulat daw nagpaila nga siya usa ka tawong impluwensiyado. Angayng matikdan nga maayo ang relasyon tali sa palasyo sa Persia ug sa mga tribo nga Arabo human sulonga sa Persia ang Ehipto.

Ang usa ka diyalektal nga porma sa Gesem, ang ngalang Gashm, gihisgotan sa usa ka inskripsiyon nga nakaplagan sa karaang Dedan, sa amihanang bahin sa Arabia. Ang ngalang Gesem makita usab sa usa ka Aramaikong inskripsiyon diha sa usa ka platang panaksan nga nakaplagan sa Ehipto. Ang sinulat mabasa: “Ang gidalang halad ni Qainu bar Gesem [Geshem], hari sa Qedar, ngadto kang [diyosa nga] han-ʼIlat.”​—Journal of Near Eastern Studies, 1956, Tomo XV, p. 2.