GIBETON

[Likod; Bungdo].

Usa ka siyudad nga sa sinugdan gipahat ngadto sa tribo ni Dan (Jos 19:​40, 41, 44) apan sa ulahi gihatag ngadto sa mga Kohatnon ingong usa ka Levihanong siyudad. (Jos 21:​20, 23) Kasiglohan sa ulahi, ang Gibeton nailalom sa mga kamot sa mga Filistehanon, ug sa dihang si Haring Nadab sa Israel misulay sa pag-ilog sa siyudad gikan kanila, siya gipatay sa nakigkunsabo nga si Baasa. (1Ha 15:27) Ang Gibeton nailalom gihapon sa pagkontrolar sa mga Filistehanon mga 24 ka tuig sa ulahi sa dihang si Omri, ang pangulo sa kasundalohan sa Israel, nagkampo batok niini. Kay gihimong hari sa nagkampong mga Israelinhon didto, giundang ni Omri ang paglikos sa Gibeton aron sa pag-atake sa karibal nga Israelinhong hari nga si Zimri.​—1Ha 16:15-18.

Ang Gibeton gituohan sa kadaghanan nga mao ang Tell el-Melat (Tel Malot), mga 9 km (5.5 mi) sa A sa gituohang nahimutangan sa Filistehanong siyudad sa Ekron.