SIKOP

[Heb., dai·yahʹ].

Ang Hebreohanong ngalan niini nga langgam makaplagan sa talaan sa mahugawng mga langgam diha sa Deuteronomio 14:13 apan dili makita diha sa susamang talaan sa Levitico 11:14. Ang upat ka Hebreohanong mga manuskrito, ug usab ang Samarianhong Pentateuch ug ang Gregong Septuagint, wala maglakip sa dai·yahʹ diha sa Deuteronomio 14:13. Gituohan sa ubang mga eskolar nga kini maoy usa ka pagtul-id nga gihimo sa magkokopya nga sa sinugdan gibutang diha sa panaplin apan sa kadugayan gilakip diha sa teksto mismo. Apan, ang plural nga porma (dai·yohthʹ) makita diha sa Isaias 34:15 nga naghubit sa mga langgam nga magtapok diha sa mga kagun-oban sa Edom human kini malaglag.

Dili matino kon unsa gayod kining langgama. Gituohan nga ang Hebreohanong ngalan naggikan sa berbo nga nagkahulogang “sakdop” o “paghagiyos.” Ang “sikop” maoy usa ka haom nga hubad, sanglit usa kini ka termino nga mapadapat sa lainlaing paagi ngadto sa bisan unsang langgam nga mandadagit, apan ilabina sa pula nga banog (Milvus milvus). Ang kadaghanang modernong mga eskolar naglangkit sa Hebreohanong pulong nga dai·yahʹ ngadto sa banog diin daghang matang niini nga langgam ang makaplagan sa Palestina.​—Tan-awa ang BANOG.