PAGSUMPAY

[sa Iningles, grafting].

Ang proseso sa pagdugtong sa salingsing (sanga, gamayng sanga) sa usa ka kahoy nga nailhang mopatunghag maayong bunga ngadto sa punoan sa laing kahoy nga mamungag ubos ug kalidad nga bunga aron madugtong kini nga permanente. Sagad nga himoon ang pagsumpay aron hiusahon ang mga mapuslanong mga kinaiyahan sa salingsing (ang maayong bunga niini) ug sa punoan sa laing kahoy (ang kusog ug kalig-on niini). Human masumpay ang mga sanga ngadto sa laing punoan, bisan tuod mokuhag sustansiya gikan sa lahi nga matang sa punoan, kini mamunga ug samang matang sa bunga nga ipamunga sa kahoy diin kini gikuha.

Si apostol Pablo, sa pagsulat ngadto sa mga Kristohanon sa Roma, nagtandi sa dili-Hudiyo nga mga Kristohanon ngadto sa mga sanga sa ihalas nga olibo nga gisumpay ngadto sa olibo sa tanaman aron ipuli sa kinaiyanhong mga sanga nga giputol. Siya miingon nga ang maong paagi sa pagsumpay maoy “sukwahi sa kinaiyahan.” Ang kinaiyanhong mga sanga nagtumong sa mga Hudiyo kinsa, tungod sa ilang pagkawalay-pagtuo, nawad-an sa ilang kahigayonan nga mahimong sakop sa langitnong Gingharian sa Mesiyas. Ang pagsumpay sa mga sanga sa ihalas nga olibo, o sa dili-Hudiyong mga Kristohanon, ngadto sa olibo sa tanaman aron mopuli sa “kinaiyanhong mga sanga” wala maghatag ug katarongan alang niadtong mga Hentil nga magbaton ug mapahitas-ong mga hunahuna, tungod kay pinaagi lamang sa pagtuo nga sila makahupot sa ilang posisyon. Dugang pa, ang pagsumpay sa mga sanga gikan sa ihalas nga olibo ngadto sa olibo sa tanaman nag-ilustrar sa permanenteng bugkos nga gipahinabo tali sa mga Hudiyo ug mga Hentil ingong mga isigkamembro sa “Israel sa Diyos.”​—Rom 11:17-24; Gal 3:28; 6:16; itandi ang Ju 15:​1-6; tan-awa ang OLIBO.