HELKAT

[Patag nga Dapit].

Usa ka siyudad nga gitala nga lakip sa utlanang mga dapit sa tribo ni Aser (Jos 19:​24, 25, 31), sa ulahi gihatag ngadto sa mga Gersonhon ingong Levihanong siyudad. (Jos 21:​27, 30, 31) Makita sa 1 Cronicas 6:75 ang laing porma niini nga ngalan ingong Hukok. Ang nahimutangan niini maoy banabana lamang. Gituohan sa pipila nga kini mao ang Khirbet el-Harbaj (Tel Regev), 18 km (11 mi) sa H sa Aco ug duol sa tiilan sa kutay sa kabukiran sa Carmelo. Ang The Illustrated Bible Dictionary nga giedit ni J. D. Douglas (1980, Tomo 2, p. 634) nag-isip nga “tingali mas haom ang Tell el-Qasis,” mga 9 km (5.5 mi) sa H sa Khirbet el-Harbaj, nga nahimutang sa agianan paingon sa Walog sa Jezreel. Sanglit ang mga lungsod sa Hali ug Beten, nga gihisgotan sunod sa Helkat diha sa talaan sa Josue 19:24-26, gihunahuna man sa kadaghanan nga anaa sa habagatang bahin sa Patag sa Aco, ang pag-isip nga kini mao ang Tell el-Qasis (Tel Qashish) magpaila nga ang utlanan magsukad sa kinatumyang HS nga kiliran sa Patag sa Aco, inay nga magsukad sa amihanan ug mopaingon sa habagatan. Apan, gikinahanglan ang dugang identipikasyon sa ubang mga lungsod aron matino kini.