HIDEKEL
Usa sa upat ka suba nga misanga gikan sa suba nga migula gikan sa Eden. (Gen 2:10-14) Ang Hidekel gitawag sa Karaang Persianhon nga Tigra, nga niana naggikan ang Gregong ngalan alang sa Suba sa Tigris. Sa Arabiko gitawag kini nga Shatt Dijla. Gitawag kini sa pipila ingong kaluha nga suba sa Euprates, ug uban niining subaa, gipatubigan niini ang kapatagan sa Mesopotamia.
Didto sa mga tampi sa Suba sa Tigris (Hidekel) nga si Daniel nakadawat ug panan-awon bahin sa pag-ilogay sa gahom nga pagasangkaon sa “hari sa amihanan” ug sa “hari sa habagatan.” (Dan 10:4, 5; 11:5, 6) Human mosulod sa kapatagan sa Mesopotamia, ang Tigris moagi sa nahimutangan sa daghang karaang mga siyudad. Atbang sa modernong Mosul nahimutang ang mga kagun-oban sa karaang Nineve sa S nga tampi sa suba. Sa mao gihapon nga kiliran, sa unahan pa dapit sa H, mao ang dapit sa Cala, ug ubos niini, sa K nga tampi, makaplagan ang karaang Asur. Dili layo ubos sa Baghdad, sa K nga tampi, mao ang mga kagun-oban sa Seleucia, ang karaang kaulohan sa dinastiya sa Seleucid nga mga magmamando.
Ang mga tuboran sa Tigris nahimutang sa sidlakang bahin sa modernong Turkey. Ang tuboran nga nahimutang sa kinatumyang bahin sa kasadpan mao ang kinalay-an, nga naggikan sa kabukiran sa habagatan sa Lanaw sa Hazar nga mga 25 km (15 mi) sa HS sa siyudad sa Elazig ug pipila ka milya lamang gikan sa usa sa mga tuboran sa Suba sa Euprates. Busa dayag nga kining duha ka suba may usa ka tuboran lamang sa wala pa ang tibuok-yutang Lunop magpahinabog kausaban sa topograpiya sa nawong sa yuta. Sa unang 240 km (150 mi) ang kasadpang tuboran nagaagos paingon sa HS ug giduyogan sa laing mas mugbong mga tuboran sa sidlakan. Dayon, sa usa ka dapit sa habagatan sa kasadpang tumoy sa Lanaw sa Van, ang suba moagos paingon pa gayod sa habagatan. Moagos kini sa usa ka lawom nga lugot sa dili pa sa kataposan mogula gikan sa kabukiran ngadto sa ibabaw nga bahin sa kapatagan sa Mesopotamia. Gikan didto hangtod sa gisang-an niini sa Suba sa Euprates, ang Tigris giagosan sa upat ka sapa gikan sa S: ang Dakong Zab, ang Gamayng Zab, ang ʽAdhaim, ug ang Diyala.
Gituohan sa kadaghanan nga sa kakaraanan, ang Tigris ug Euprates lahi ug agosanan paingon sa dagat, apan sa paglabay sa kasiglohan ang pagdaghan sa mga binanlas nakapuno sa ulohan sa gulpo mao nga karon nag-usa na ang agosanan niini nga mga suba. Human kini mag-usa naporma niini ang halapad nga sapa nga gitawag ug Shatt-al-Arab, nga moagos ug mga 160 km (100 mi) sa dili pa moagos ngadto sa Gulpo sa Persia.
Ang bug-os nga gitas-on sa Tigris mokabat ug mga 1,850 km (1,150 mi). Halapad kini nga sapa, diin sa pipila ka dapit kini may gilapdon nga 366 m (400 yd), apan sa katibuk-an mabaw ra kini, ug sa ibabaw sa Baghdad matabok lamang kini pinaagig mga sakayan nga mabaw ug lutaw. Ang Tigris mas sulog kay sa Euprates apan kini maoy mga dos-tersiya lamang ang gitas-on kon itandi sa “kaluha” niini ug dili kaayo ilado sa patigayon.