HOR

[Heb., Hor ha·harʹ, “Bukid sa Hor”].

1. Ang bukid nga haduol sa Mosera sa utlanan sa Edom diin namatay si Aaron sa hapit nang mosulod ang Israel sa Yutang Saad. Samtang nagtan-aw ang katigoman sa Israel, si Aaron, Moises, ug ang anak nga lalaki ni Aaron nga si Eleasar mitungas sa Bukid sa Hor. Didto sa tumoy sa bukid, gihukas ni Moises ang mga besti sa pagkasaserdote ni Aaron ug gisul-ob kini kang Eleasar. Human niini, si Aaron namatay, ug si Moises ug Eleasar lagmit naglubong kaniya didto.​—Num 20:22-29; Deu 32:50; itandi ang Deu 10:6.

Matod sa historyador nga si Josephus, ang Bukid sa Hor mao ang usa sa taas nga mga bukid nga naglibot sa Edomhanong siyudad sa Petra. (Jewish Antiquities, IV, 82, 83 [iv, 7]) Ang tradisyon naglangkit niini sa Jebel Harun (nagkahulogang “Bukid ni Aaron”), usa ka kaluhag-tumoy, pulang sandstone nga bukid nga may gihabogong mga 1,460 m (4,790 p) ug nahimutang nga duolan ug 5 km (3 mi) sa KHK sa Petra. Apan, ang Jebel Harun daw dili mohaom sa gihubit sa Bibliya bahin sa pagbiya sa Israel gikan sa Kades (Kades-barnea) paingon sa Bukid sa Hor “didto sa utlanan sa yuta sa Edom.” (Num 33:37-39, 41) Ang Jebel Harun wala mahimutang sa utlanan sa Edom, apan anaa sa sulod sa maong yuta. Busa aron ang Israel makaabot niining tradisyonal nga dapit kinahanglang molatas sila sa teritoryo sa Edom. Apan dili mahimong nahitabo kini, sanglit una pa niini ang mga Israelinhon wala tugoti nga moagi latas sa Edom. (Num 20:14-22; Deu 2:5-8) Busa, daghang eskolar ang mipabor sa pagtuo nga posibleng mao kini ang hilit, titip-ug-kiliran, samag tisas kaputi nga Jebel Madurah (Har Zin [Hor Ha Har]), usa ka bukid nga mga 40 km (25 mi) sa HK sa Patayng Dagat, ug mga 60 km (37 mi) sa SAS sa Kades.

2. Usa ka bukid nga nagtimaan sa amihanang tumoy sa Canaan. (Num 34:​7, 8) Dili matino kon asa kining dapita. Gituohan sa pipila ka eskolar nga kining Bukid sa Hor (Heb., Hor ha·harʹ) lagmit mao ra usab ang Bukid sa Hermon. Gisugyot sa uban nga lagmit nagtumong kini sa katibuk-ang Kabukiran sa Lebanon o sa usa ka prominenteng bukid niini.