HUPIM

Usa ka anak nga lalaki o kaliwat ni Benjamin nga gilakip sa talaan niadtong miadto sa Ehipto kauban sa panimalay ni Jacob niadtong 1728 W.K.P. o natawo didto sa panahon nga buhi pa si Jacob. (Gen 46:​8, 21) Ang ubang mga teksto nagpasabot nga siya maoy usa ka apong lalaki o apo-sa-tuhod pinaagi kang Bela ug Iri. (1Cr 7:​6, 7, 12; sa 8:1-5 siya mopatim-aw nga gitawag ug Huram.) Daw dili igo ang panahon nga nalangkit nga si Benjamin aduna nay mga apo sa dihang siya misulod sa Ehipto, apan ang Genesis 46:8 mahimong sabton nga nagpaila nga kining tanang kalag nangatawo samtang buhi pa si Jacob sa iyang pagpanimuyo didto sa Ehipto, dili kay natawo sa wala pa siya ug ang iyang banay moadto didto. (Tan-awa ang BENJAMIN Num. 1.) Ang banay nga gipundar ni Hupim (gitawag usab ug Hupam), nga gitawag ug mga Hupamnon, giihap nga lakip sa tribo ni Benjamin sa ikaduhang pagsenso sa mga Israelinhon didto sa kamingawan. (Num 26:1-4, 38, 39) Si Hupim gihisgotan usab sa 1 Cronicas 7:​14, 15 nga kauban ni Manases, apan dili tino ang ilang kalangkitan.