JAAZANIAS

[Si Jehova Nagpatalinghog].

Sa hapit nang matapos ang gingharian sa Juda mopatim-aw nga kini nahimong komon nga ngalan; ang upat ka tawong gihisgotan sa Bibliya nga adunay ingon niining ngalana nabuhi sulod sa samang mubong yugto sa panahon. Ang ngalan nakaplagan usab diha sa Mga Sulat sa Lakis, ug sa usa ka timbre nga nakaplagan sa Tell en-Nasbeh makita ang mga pulong nga “Yaʼazanyahu, alagad [opisyal] sa hari.” (The Biblical Archaeologist, 1947, p. 71) Apan, walay direktang ebidensiya nga ang maong inskripsiyon nagtumong sa bisan hain sa mosunod nga mga tawo.

1. Usa ka pangulo sa mga Rekabita nga gisulayan ni manalagnang Jeremias, ubos sa sugo ni Jehova, pinaagi sa pagdala kanila ngadto sa usa sa mga lawak-kan-anan sa templo ug naghatag kanila ug bino nga mainom. Sila midumili, agig pagtuman sa sugo nga gihatag kanila kapin na sa duha ka siglo kanhi pinaagi sa ilang katigulangan nga si Jonadab (Jehonadab) nga anak nga lalaki ni Rekab. Tungod niini, si Jehova misaad: “Dili mawad-an si Jonadab nga anak nga lalaki ni Rekab ug tawo nga mobarog kanunay sa akong atubangan.” Si Jaazanias maoy anak nga lalaki sa laing Jeremias.​—Jer 35:1-10, 19.

2. Anak nga lalaki ni Sapan; ang bugtong indibiduwal nga ginganlan sa panan-awon ni Ezequiel (612 W.K.P.) sa 70 ka lalaki nga nagtanyag ug insenso atubangan sa kinulit nga idolatrosong mga simbolo diha sa templo sa Jerusalem.​—Eze 8:​1, 10, 11.

3. Anak nga lalaki ni Azur; usa sa 25 ka tawo nga nakita sa panan-awon ni Ezequiel nga nagbarog diha sa sidlakang ganghaan sa templo ni Jehova. Si Jaazanias ug ang iyang mga kauban “naglaraw ug kadaot ug naghatag ug daotang tambag batok niini nga siyudad,” ug si Ezequiel gisugo sa pagpanagna batok kanila.​—Eze 11:1-4.

4. Usa ka pangulo sa kasundalohan sa Juda sa mubong yugto human gilayon sa kalaglagan sa Jerusalem pinaagi sa mga Babilonyanhon. Si Jaazanias (Jezanias, ingon sa pag-espeling usahay sa iyang ngalan) maoy usa sa pipila nga mipaluyo dayon sa pagkatudlo ni Gobernador Gedalias. (2Ha 25:23; Jer 40:​7, 8) Lagmit nga lakip siya sa dihang ang “tanang pangulo sa mga kasundalohan” nagpasidaan kang Gedalias bahin sa hulga ni Ismael sa iyang kinabuhi ug, human mapatay ni Ismael si Gedalias, migukod kang Ismael ug nagbawi niadtong gidala niya ingong binilanggo. (Jer 40:​13, 14; 41:11-16) Si Jezanias maoy lakip niadtong mga pangulo nga nagpakisayod kang Jeremias mahitungod sa kon unsay buhaton niadtong higayona, apan imbes sundon ang iyang tambag, sila nanguna sa pipila nga nahibilin sa pagdangop sa Ehipto. (2Ha 25:26; Jer 42:1-3, 8; 43:1-5) “Si Azarias nga anak nga lalaki ni Hosaia” lagmit maoy igsoon ni Jaazanias, apan mas posible nga siya mao ra usab si Jaazanias.​—Jer 43:2.