JEHOSAPAT, UBOS NGA PATAG NI

Dayag nga usa ka simbolikong dapit nga gitawag usab ug “ubos nga patag sa desisyon.” (Joe 3:​2, 14) Sanglit nalangkit kini sa pagpahamtang sa Diyos ug paghukom, haom nga gitawag kini ug “ubos nga patag ni Jehosapat,” tungod kay ang ngalang Jehosapat nagkahulogang “Si Jehova Maoy Maghuhukom.” Labot pa, panahon sa paghari ni Jehosapat giluwas ni Jehova ang Juda ug Jerusalem gikan sa nagtingob nga mga kasundalohan sa Ammon, Moab, ug sa bukirong rehiyon sa Seir, ug tungod niadto ang kaawayng kasundalohan nangalibog ug nagpinatyanay sa usag usa.​—2Cr 20:1-29.

Sa simbolikong “ubos nga patag ni Jehosapat” gihukman ni Jehova ang kanasoran ingong takos sa kalaglagan tungod sa ilang pagdaogdaog sa iyang katawhan. Ang ubos nga kapatagan mismo nagsilbing simbolikong pug-anan sa bino aron sa pagtamak sa kanasoran sama sa mga bulig sa ubas. Dili gayod makataronganon nga isipon nga ang “ubos nga patag ni Jehosapat” mao ang literal nga Walog sa Kidron, ang Walog sa Hinnom, o ang Walog sa Jezreel, ingon sa pag-isip sa pipila. Walay usa niini nga mga walog ang arang makapaigo sa ‘tanan’ nga kanasoran.​—Joe 3:1-3, 12-14; itandi ang Pin 14:18-20.