JOZABAD

[pinamubo sa Jehozabad, lagmit nagkahulogang “Si Jehova Naggasa”].

1. Usa ka manggugubat nga miduyog kang David didto sa Ziklag; usa ka Gederahanon.​—1Cr 12:1-4.

2, 3. Ang duha ka tawo nga nagbaton niining ngalana maoy lakip sa mga pangulo sa tribo ni Manases nga mitalikod dapig kang David sa dihang didto siya sa Ziklag ug nahimong mga pangulo sa iyang kasundalohan.​—1Cr 12:​20, 21.

4. Usa ka komisyonado nga gitudlo ni Haring Ezequias aron motabang sa pag-atiman sa mga ikapulo, mga amot, ug sa balaang mga butang nga gidala sa katawhan; walay duhaduha nga usa ka Levihanon.​—2Cr 31:​12, 13.

5. Usa ka Levihanong pangulo nga nag-amot ug daghang karnero ug baka alang sa dakong pagsaulog ni Haring Josias sa Paskuwa.​—2Cr 35:​1, 9, 18.

6. Usa sa mga Levihanon human sa pagkadestiyero nga sa iyang kamot gitimbang ni Esdras ug sa iyang mga kauban ang tanang bililhong mga butang nga ilang gidala sa Jerusalem gikan sa Babilonya niadtong 468 W.K.P. (Esd 8:​33, 34) Tan-awa ang Num. 8, 9, ug 10.

7. Usa ka anak nga lalaki o kaliwat ni Pasur, ug usa sa mga saserdote nga nagpapahawa sa ilang langyawng mga asawa ug mga anak.​—Esd 10:​22, 44.

8. Usa sa mga Levihanon nga malamposong nadasig ni Esdras sa pagpapahawa sa ilang langyawng mga asawa. (Esd 10:​10, 11, 23, 44) Lagmit nga mao ra ang Num. 6, 9, ug 10.

9. Usa sa mga Levihanon nga kauban ni Esdras ug Nehemias kinsa nagbasa ug nagpatin-aw sa Balaod ngadto sa katawhan. (Neh 8:7-9) Lagmit nga mao ra ang Num. 6, 8, ug 10.

10. Usa ka Levihanon nga “nagdumala sa mga buluhaton sa gawas” sa natukod pag-usab nga templo. (Neh 11:​15, 16) Lagmit nga mao ra ang Num. 6, 8, ug 9.