KOHATNON

[Kang (Iya ni) Kohat].

Usa ka kaliwat sa pangulo sa banay nga si Kohat, kinsa usa sa tulo ka anak nga lalaki ni Levi. (Gen 46:11; Num 26:57) Ang “mga Kohatnon” o “mga anak nga lalaki ni Kohat” gibahin ngadto sa upat ka banay, ug kini sila mga kaliwat sa upat ka anak nga lalaki ni Kohat: ang mga Amramnon, mga Izarnon, mga Hebronhon, ug ang mga Uzielnon. (Num 3:​19, 27) Ang ilang pangulo panahon sa pagkampo sa Israel didto sa Bukid sa Sinai (1513 W.K.P.) mao si Elizapan nga anak nga lalaki ni Uziel.​—Num 3:30.

Si Moises ug Aaron maoy mga Kohatnon sa banay sa mga Amramnon (Ex 6:​18, 20); ang rebelyosong si Kore maoy usa ka Kohatnon sa banay sa mga Izarnon (Num 16:1), sama sa matinumanong manalagna nga si Samuel.​—1Sa 1:​1, 19, 20; 1Cr 6:33-38.

Ang pagsenso nga gihimo didto sa Kamingawan sa Sinai nagpakita nga dihay 8,600 ka lalaki nga usa ka bulan ang kagulangon pataas nga sakop sa mga banay sa mga Kohatnon. (Num 3:​27, 28) Sumala sa pipila ka manuskrito sa Gregong Septuagint, ang gidaghanon maoy 8,300. Kon kining mas ubos nga gidaghanon idugang sa 7,500 ug sa 6,200 sa Numeros 3:​22, 34, ang bug-os nga gidaghanon mokabat ug 22,000​—ang mismong gidaghanon nga makaplagan sa Numeros 3:39. Ang ilang mga lalaki nga nagpangedaron tali sa 30 ug 50 ka tuig nga “misulod sa grupong tig-alagad alang sa pag-alagad sa tolda nga tagboanan” mikabat ug 2,750.​—Num 4:34-37.

Panahon sa pagpanaw didto sa kamingawan, ang mga Kohatnon gitudlo sa pagkampo dapit sa H nga kiliran sa tabernakulo (Num 3:29), taliwala niini ug sa kampo sa mga tribo ni Ruben, Simeon, ug Gad. (Num 2:​10, 12, 14) Pribilehiyo ug responsibilidad sa mga Kohatnon ang pagdala sa arka sa pakigsaad, sa lamesa sa pasundayag nga tinapay, sa tangkawan, sa mga halaran, ug sa mga galamiton sa balaang dapit, maingon man usab sa tabil sa Labing Balaan (Num 3:​30, 31), human nga kining mga butanga giempake ug gitabonan ni Aaron ug sa iyang mga anak nga lalaki, nga mga Kohatnon usab. Ang mga Kohatnon gawas kang Aaron ug sa iyang mga anak nga lalaki wala tugoti nga motan-aw sa mga galamiton bisan sa makadiyot o sa paghikap sa balaang dapit, kay ang pagbuhat niana magkahulogan ug kamatayon. (Num 4:4-15, 20) Bisan tuod gitagan-an sa Israel ang mga Levihanon ug mga baka ug mga karomata alang sa pagdala sa mga kasangkapan sa tabernakulo, ang mga Kohatnon wala hatagi niini. Walay duhaduha tungod sa pagkasagrado sa ilang mga luwan, kini ilang pas-anon. (Num 7:2-9) Sila mao ang kinaulahian sa mga Levihanon nga mobiya sa matag pagkampo.​—Num 10:17-21.

Human sa pagsakop sa Canaan, sa dihang ang mga Levihanon gihatagan ug pipila ka siyudad, ang mga Kohatnon nakadawat ug 23; ang “mga anak” ni Aaron (nga mao, ang mga Kohatnon) gihatagan ug 13 ka siyudad gikan sa teritoryo sa Juda, Simeon, ug Benjamin, ug ang uban sa mga Kohatnon gihatagan ug laing 10 ka siyudad gikan sa mga teritoryo sa Epraim, Dan, ug sa katunga sa tribo ni Manases.​—Jos 21:1-5, 9-26; 1Cr 6:54-61, 66-70.

Si Heman, nga usa ka Kohatnon sa banay ni Izar, gihatagan ni David ug katungdanan may kalabotan sa pag-awit diha sa sangtuwaryo ni Jehova. (1Cr 6:31-38) Ang usa ka gatos ug kawhaan ka Kohatnon nga ubos ni Uriel nga ilang pangulo maoy lakip niadtong gitudlo ni David sa pagdala sa arka ni Jehova gikan sa balay ni Obed-edom ngadto sa Jerusalem, nga sa maong higayon si Heman espesipikong gihisgotan may kalabotan sa pagtugtog ug sa pag-awit. (1Cr 15:​4, 5, 11-17, 19, 25) Sumala sa Unang Cronicas, sa dihang gibahin ni David ang mga Levihanon ngadto sa mga grupo, o mga dibisyon, ang pipila ka mga Kohatnon gitudlo ingong mga mag-aawit (25:​1, 4-6) ug mga magbalantay-sa-ganghaan (26:1-9); ang uban gitudlo ingong mga tinugyanan sa mga tipiganan ug sa mga butang nga gibalaan (26:23-28); ug ang pipila nag-alagad ingong mga opisyal, mga maghuhukom, ug mga administrador. (26:29-32) Ang pipila ka Kohatnon gipiyalan sa pagluto ug sa pag-andam sa tinapayng linut-od alang sa Igpapahulay.​—1Cr 9:​31, 32.

Ang mga Kohatnon midayeg kang Jehova sa dihang ilang nahibaloan nga siya mohatag ug kadaogan sa Juda ubos ni Jehosapat batok sa hiniusang kasundalohan sa Ammon, Moab, ug Seir. (2Cr 20:14-19) Ang Kohatnong mga Levihanon miduyog sa paghinlo sa balay ni Jehova sa adlaw ni Haring Ezequias. (2Cr 29:12-17) Dugang pa, ang Kohatnon nga si Zacarias ug Mesulam maoy lakip niadtong nag-alagad ingong mga magtatan-aw sa dihang giayo ni Haring Josias ang templo.​—2Cr 34:8-13.