KOREHANON

[Kang (Iya ni) Kore].

Kaliwat ni Kore, kinsa mirebelde sa adlaw ni Moises. Ang mga Korehanon maoy usa ka banay sa amahan sa Kohatnong mga Levihanon ug naggikan kang Kore pinaagi sa iyang tulo ka anak nga lalaki nga si Asir, Elkana, ug Abiasap. (Ex 6:​18, 21, 24; Num 16:1-3) “Ang mga anak ni Kore wala mangamatay” duyog sa ilang amahan (Num 26:​10, 11), tungod kini kay sila wala mosunod kaniya sa pagrebelde.

Sa gihimong pagsenso sa Israel sa Kapatagan sa Moab, “ang banay sa mga Korehanon” narehistro uban sa banay sa mga Levihanon. (Num 26:​57, 58) Sa dihang si David ilalom pa sa mga pagpig-ot ni Haring Saul, ang pipila ka mga Korehanon maoy lakip sa gamhanang mga tawo nga miduyog kaniya sa Ziklag. (1Cr 12:​1, 6) Ang Levihanong mag-aawit nga si Heman ug ang manalagnang si Samuel maoy mga Korehanon (1Cr 6:33-38), ug giorganisar ni Haring David ang mga membro sa banay ni Heman ingong mga mag-aawit. (1Cr 15:​16, 17; 16:​37, 41, 42; 25:​1, 4-6) Ang mga Korehanon maoy lakip sa mga magbalantay-sa-ganghaan sa balay ni Jehova (1Cr 26:1-9, 19), ug sa adlaw ni Jehosapat “ang mga Levihanon sa mga anak sa mga Kohatnon ug sa mga anak sa mga Korehanon mitindog sa pagdayeg kang Jehova nga Diyos sa Israel uban sa labihan ka kusog nga tingog,” tungod sa gisaad nga kaluwasan batok sa nagkahiusang kasundalohan sa Moab, Ammon, ug Seir.​—2Cr 20:14-19.

Ang mga superskripsiyon sa Salmo 42, 44-49, 84, 85, 87, ug 88 espesipikong naghisgot sa mga anak ni Kore. Bisag ang ilang katigulangan nahimong rebelyoso, wala papanubaga ni Jehova ang mga anak ni Kore tungod sa iyang sala, ug tungod sa ilang pagkamatinumanon sila gipanalanginan ug gipasidunggan nga mag-alagad sa templo.