LEHI

[Bukog sa Apapangig].

Ang dapit sa usa o, lagmit, duha ka kadaogan sa Israel batok sa mga Filistehanon. Ang tukmang nahimutangan niini wala mahibaloi karong adlawa. Gituohan sa pipila nga kini mao ang Khirbet es-Suyag, nga lagmit nagkuha sa ngalan niini gikan sa Gregong pulong nga si·a·gonʹ (bukog sa apapangig), wala pay 3 km (2 mi) sa S sa Bet-semes.

Didto sa Lehi, si Samson mipatay ug usa ka libo ka Filistehanon ginamit ang basabasa pa nga bukog sa apapangig sa usa ka asno. Human niadto iyang gitawag ang dapit nga Ramat-lehi (nagkahulogang “Habog nga Dapit sa Bukog sa Apapangig”), tingali aron handomon ang kadaogan nga gihatag kaniya ni Jehova didto. (Huk 15:9-19) Apan, sa sinugdan ang Lehi lagmit nga nakabaton sa ngalan niini tungod sa porma sa dagkong mga bato niini.

Sa ulahi, sumala sa paghubad sa daghang maghuhubad, si Sammah mipatay ug daghang Filistehanon nga nagkatigom sa Lehi. (2Sa 23:​11, 12; AT, JB, NW, RS) Apan, ang Hebreohanong termino nga la·chai·yahʹ sa literal nagkahulogang “ngadto sa balangay sa tolda,” ug, pinaagig gamayng kausaban sa marka para sa bokales, kini gihubad nga “ngadto sa Lehi.”