LUD, LUDIM

1. Usa ka anak nga lalaki ni Sem (Gen 10:22; 1Cr 1:17) kansang mga kaliwat gituohan ni Josephus (ug sa uban) nga mao ang mga Lydianhon sa HK sa Asia Minor. (Jewish Antiquities, I, 143, 144 [vi, 4]) Ang Asiryanhong mga inskripsiyon sa ikapitong siglo W.K.P. naghisgot sa mga Lydianhon ingong Luddu.

2. Usa ka kaliwat ni Ham pinaagi kang Mizraim. (Gen 10:6, 13; 1Cr 1:8, 11) Ang katawhan nga naggikan niining Hamitikanhong Lud dayag nga mao ‘ang mga Ludim’ nga ilado sa ilang kahanas sa paggamit ug pana nga, uban sa Hamitikanhong Put ug Cus, giapil diha sa kasundalohan sa Ehipto. (Jer 46:8, 9; itandi ang Eze 30:4, 5.) Ang samang paghisgot sa tiggamit ug pana nga Lud sa Isaias 66:19 daw nagtumong sa Hamitikanhong Lud, inay sa Semitikanhon, sama niadtong gilakip taliwala sa mga nasod nga halayo sa Israel. Ang mga Ludim nga mihatag ug militaryong pag-alagad sa Tiro mas lisod ilhon. (Eze 27:3, 10) Apan, ang ilang pagkalangkit uban sa Put diha sa teksto lagmit magtumong gihapon sa Hamitikanhong Ludim.

Sumala sa mga tekstong nahisgotan makataronganong ipahimutang ang Hamitikanhong Ludim diha sa Amihanang Aprika, apan imposible nga mas matino ang ilang gipuy-an. Ang pipila ka eskolar nagpahimutang kanila diha sa kasilinganan sa Libya, apan kini ilang gibuhat pinasukad sa binuotbuot nga pag-usab sa espeling niini nga ngalan ngadto sa Lub inay nga Lud.