LISTRA

Usa ka siyudad sa Licaonia, usa ka rehiyon sa habagatang-sentral nga bahin sa Asia Minor. Ang Listra gituohan nga mao ang usa ka bungdo dapit sa A sa Hatunsaray, nga nahimutang sa usa ka tabunok, daghag tubig nga dapit nga mga 32 km (20 mi) sa HHK sa Konya (Iconio).

Si apostol Pablo ug Bernabe miadto sa Listra sa Romanhong lalawigan sa Galacia human pugsa sa pagpabiya sa Iconio tungod sa gihimong lakang sa pagbato kanila. Niadtong higayona ang siyudad maoy usa ka kolonya sa Roma, nga gihimong kolonya ni Agusto una pa niana. Apan, ang lumad nga mga molupyo naggamit pa gihapon sa Licaonianhong pinulongan. Human ayoha ni Pablo ang usa ka tawong bakol sukad pa sa pagkahimugso, ang panon sa katawhan nanghinapos nga siya ug si Bernabe maoy nagpakatawo nga mga diyos, nga si Hermes ug Zeus. Halos wala nila kapugngi ang mga tawo sa paghalad ngadto kanila. Apan, sa ulahi, gisugniban sa mga Hudiyo gikan sa Iconio ug Pisidia sa Antioquia ang mga molupyo sa Listra batok kang Pablo nga tungod niana ilang gibato siya ug giguyod ang iyang lawas ngadto sa gawas sa siyudad, kay gituohang siya patay na. Human niadto, sa dihang gilibotan sa mga isigka-Kristohanon, si Pablo mibangon, miadto sa Listra, ug dayon inubanan ni Bernabe, sila mibiya sa pagkasunod adlaw paingon sa Derbe.​—Buh 14:​1, 5-20.

Human sa ilang kalihokan didto sa Derbe, si Pablo ug Bernabe mibalik sa Listra, Iconio, ug Antioquia. Sila nagpalig-on ug nagdasig sa mga tinun-an nga nakig-uban sa bag-ong natukod nga Kristohanong mga kongregasyon sa maong mga siyudad ug nagtudlo ug mga ansiyano.​—Buh 14:21-23.

Sa ulahi, human mahusay sa mga apostoles ug sa mga ansiyano sa kongregasyon sa Jerusalem ang isyu bahin sa pagtuli (mga 49 K.P.), si Pablo miduaw na usab sa Derbe ug Listra. Ang paghisgot niini diha sa Buhat 16:1 mahimong sabton nga ang batan-ong lalaki nga si Timoteo nagpuyo didto sa Listra o kaha sa kasikbit nga Derbe. Apan ang ebidensiya daw mopabor sa Listra. Kay bisan tuod nga ang Derbe wala na hisgoti pag-usab maylabot kang Timoteo, ang Buhat 16:2 espesipikong nag-ingon nga “ang mga igsoon sa Listra ug Iconio may maayong panghimatuod” bahin kang Timoteo. (Tan-awa usab ang 2Ti 3:​10, 11.) Si Timoteo nakahimo gayod ug maayong pag-uswag nga tungod niana gipili siya ni Pablo ingong kauban sa panaw.​—Buh 16:3.

Sa dihang si apostol Pablo miduaw sa nagkalainlaing mga dapit sa “kayutaan sa Galacia” sa iyang ikatulong misyonaryong panaw, siya lagmit mihapit usab sa Listra.​—Buh 18:23.