MADMANA

[gikan sa lintunganayng pulong nga nagkahulogang “kinalibang”].

1. Kini nga ngalan makita diha sa talaan sa mga kaliwat ni Juda pinaagi kang Caleb. Ang puyopuyo ni Caleb nga si Maaca giingon nga nanganak kang “Saap nga amahan ni Madmana.” (1Cr 2:49) Apan, ang kadaghanang eskolar nag-isip sa terminong “amahan” nga gigamit dinhi diha sa diwa nga “nagpundar” ug nag-isip sa Madmana niining tekstoha nga mao ang lungsod nga gihisgotan sa Num. 2, si Saap ang gituohan nga mao ang nagpundar o tingali ang nagtukod pag-usab niana human kini mailog. Angayng matikdan nga ang mga ngalan nga Kiriat-jearim ug Betlehem makita sa samang konteksto sa mosunod nga mga bersikulo.​—1Cr 2:​50, 54.

2. Usa ka siyudad sa habagatang bahin sa teritoryo sa Juda. (Jos 15:​21, 31) Bisan tuod ang Umm Deimneh tingali nagpreserbar sa karaang ngalan niini, walay nahibiling mga butang sa maong dapit nga tinong magpaila nga kini mao ang Madmana. Ang mga eskolar niining bag-o pa mipabor sa Khirbet Tatrit, mga 15 km (9.5 mi) sa AS sa Beer-seba. Ang pagtandi sa Josue 15:31 sa samang mga talaan sa Josue 19:5 ug sa 1 Cronicas 4:31 nagpakita nga kini mao ra ang Bet-marcabot. Ang Bet-marcabot (nagkahulogang “Balay sa mga Karo”) lagmit maoy ikaduha nga ngalan sa Madmana.​—Tan-awa ang BET-MARCABOT.