MARESA(H)
[Dapit Diha sa Ulohan (Tayuktok)].
1. Usa ka kaliwat ni Juda nga gitawag nga “amahan” ni Hebron. (1Cr 2:3, 42) Bisan tuod ikahinapos nga si Maresah mao ang katigulangan sa mga molupyo sa siyudad sa Hebron, daw imposible kini sanglit ang Hebron nga gihisgotan dinhi adunay mga anak ug busa dayag nga usa ka tawo.—1Cr 2:43.
2. Usa ka kaliwat ni Juda pinaagi kang Sela. Si Laada gipaila nga mao ang “amahan ni Maresah.” (1Cr 4:21) Bisan tuod posible nga kini nga Maresah (o ang iyang amahan nga si Laada) mao ang nagpundar sa lungsod sa Maresah, o nga siya mao ra usab ang tawo nga taga-Juda nga gihisgotan sa itaas, kining mga butanga dili gayod matino.
3. Sanglit usa kini sa grupo sa siyam ka siyudad diha sa rehiyon sa Sepela sa Juda (Jos 15:44), ang Maresah nag-okupar sa usa ka posisyon nga hinungdanon kaayo tupad sa usa sa mga walog nga nahimong kinaiyanhong ruta gikan sa patag daplin sa baybayon paingon sa kabukiran ug sa Hebron. Gituohan nga kini mao ang Tell Sandahannah (Tel Maresha), mga 1.5 km (1 mi) sa H sa Beit Jibrin (Bet Guvrin).
Si Haring Rehoboam, ang manununod ni Solomon, nagtukod ug usa ka kinutaang siyudad sa Maresah, sa ingon nagpalig-on sa mga depensa sa Juda batok sa pag-atake gikan niana nga direksiyon. (2Cr 11:5, 8) Si Zera nga Etiopianhon nangharos gikan sa H uban sa iyang dakong pundok sa kasundalohan nga usa ka milyon ug gisugat didto sa Maresah sa kasundalohan ni Haring Asa, ug ang gubat, nga miresulta sa kadaogan sa Juda tungod sa tabang sa Diyos, giaway nianang lugara. Gigukod ni Asa ang napilding kasundalohan sa Etiopia sa mga 35 km (22 mi) paingon sa Gerar, sa HK sa Maresah. (2Cr 14:9-13) Ang Maresah, nga gitawag usab ug Maresa, mao ang lungsod nga natawhan ni manalagnang Eliezer, kinsa sa tukma nagtagna sa kapakyasan sa pakigkombuya ni Haring Jehosapat kang Ahazias sa Israel sa negosyo sa mga barko. (2Cr 20:35-37) Ang tagna ni Miqueas, nga nagpasidaan sa apostatang Juda ug Israel sa nagsingabot nga pagsilot, espesipikong naghisgot sa Maresah.—Miq 1:15.
Sa yugto human sa pagkadestiyero, ang Maresah gitawag nga Marisa ug nagpabiling usa ka dapit nga hinungdanon kaayo, bisan tuod kini nahimong kolonya sa Sidon ug sa ulahi nahimong salipdanan sa mga Idumeanhon. Sa kataposan kini gilaglag sa mga Partianhon niadtong 40 W.K.P.