MARTA
Usa ka babayeng Hudiyo, ang igsoon ni Lazaro ug Maria nga taga-Betania. (Ju 11:1, 2) Dayag nga si Kristo tigduawan sa ilang balay kon siya anaa sa kasilinganan sa Jerusalem. Siya ug kining tulo suod kaayo kay espesipikong giingon: “Karon gihigugma ni Jesus si Marta ug ang iyang igsoong babaye ug si Lazaro.”—Ju 11:5.
Si Lucas nagtaho nga sa dihang si Jesus misulod sa “usa ka balangay,” ang “usa ka babaye nga ginganlag Marta midawat kaniya ingon nga dinapit sa balay.” (Luc 10:38) Pinasukad sa Mateo 26:6, Marcos 14:3, ug Juan 12:1-3, gituohan nga si Marta mao ang asawa, o ang balo, o bisan gani ang anak ni Simon nga sanlahon. Hinuon, ang Kasulatan wala mohimog espesipikong mga pahayag agig pagsuportar niining maong mga panghunahuna.
Sa usa ka okasyon, sa dihang si Jesus miduaw sa balay ni Lazaro, Maria, ug Marta, si Maria ‘milingkod diha sa tiilan sa Ginoo ug nagpadayon sa pagpamati sa iyang pulong,’ samtang si Marta “nalinga sa pag-atiman sa daghang buluhaton.” Si Marta misulay sa pagpatabang kang Maria, nga miingon: “Ginoo, walay bale ba kanimo nga gipasagdan ako sa akong igsoong babaye nga nag-inusara sa pag-atiman sa mga butang? Busa, sultihi siya nga motabang kanako.” Tin-aw nga si Marta nabalaka sa pagtagbaw sa materyal nga mga panginahanglan ni Jesus. Apan gipasiugda gilayon ni Kristo ang labaw nga bili sa espirituwal nga mga butang ug malulotong nagbadlong kaniya, nga nag-ingon: “Marta, Marta, ikaw nabalaka ug napuliki bahin sa daghang butang. Apan, pipila ra ka butang ang gikinahanglan, o usa lang. Sa iyang bahin, gipili ni Maria ang maayong bahin, ug dili kini pagakuhaon gikan kaniya.” (Luc 10:38-42) Igo na unta alang kang Kristo ang usa ka matang sa pagkaon kon sa iyang pagbuhat niana makabaton usab si Marta ug mas dakong kaayohan gikan sa iyang pagpanudlo.
Bisan tuod mabalak-on kaayo tingali si Marta sa materyal nga mga butang, dili angayng ihinapos nga siya kulang ug interes sa espirituwal nga mga butang. Human sa kamatayon ni Lazaro, si Marta ang misugat kang Jesus sa dihang si Jesus nagpaingon sa Betania, samtang si Maria, sa sinugdan, naglingkod sa balay (lagmit tungod sa kaguol o tungod sa daghang higala nga miduaw). Si Marta nagpasundayag ug pagtuo kang Kristo sa dihang siya miingon nga si Lazaro dili unta mamatay kon diha pa si Jesus. Siya usab miila: “Ako nahibalo nga mobangon siya diha sa pagkabanhaw sa kataposan nga adlaw,” nga nagpakitang siya adunay pagtuo sa pagkabanhaw. Nianang maong panagkabildo si Jesus misaysay nga siya mao “ang pagkabanhaw ug ang kinabuhi,” nga nagpunting nga bisan tuod mamatay ang usa nga nagpasundayag ug pagtuo kaniya, siya mabuhi. Sa dihang si Kristo misukna kang Marta, “Motuo ka ba niini?” siya tataw nga nagpakita sa iyang pagtuo pinaagi sa pagtubag: “Oo, Ginoo; ako nagatuo nga ikaw mao ang Kristo nga Anak sa Diyos, ang Usa nga moanhi sa kalibotan.” (Ju 11:19-27) Siyempre, posible nga siya may diyutayng pagduhaduha kon unsa kahay mahimo o buhaton karon ni Jesus maylabot sa namatay niyang igsoon. (Itandi ang tinamdan sa mga apostoles nga giasoy sa Luc 24:5-11.) Sa lubnganan ni Lazaro, sa dihang gisugo ni Kristo nga kuhaon ang bato, si Marta miingon: “Ginoo, baho na siya sa pagkakaron, kay ikaupat na man ka adlaw.” Apan sa pagtubag si Jesus nangutana: “Wala ba ako magsulti kanimo nga kon motuo ka makita mo ang himaya sa Diyos?” Niana siya nakasaksi sa dihang gibanhaw ang iyang igsoon.—Ju 11:39-44.
Human sa pagkabanhaw ni Lazaro, si Kristo mibiya. Sa ulahi, siya mibalik sa Betania ug nakigtigom duyog sa uban, lakip kang Marta, Maria, ug Lazaro, didto sa balay ni Simon nga sanlahon. Gihikay ang panihapon ug “si Marta nagsilbi” pag-usab. Si Lazaro didto sa lamesa, ug nianang okasyona nga si Maria nagdihog kang Jesus pinaagi sa mahal kaayong pinahumotan nga lana. (Ju 12:1-8; Mat 26:6-13; Mar 14:3-9) Ang Kasulatan walay giingon mahitungod sa misunod nga mga panghitabo sa kinabuhi ni Marta ug sa panahon ug sa mga kahimtang sa iyang kamatayon.