MATEO

[lagmit pinamubo sa Heb. nga Matitias, nga nagkahulogang “Gasa ni Jehova”].

Usa ka Hudiyo ug nailhan usab ingong Levi, nga nahimong apostol ni Jesu-Kristo ug magsusulat sa Ebanghelyo nga nagdala sa iyang ngalan. Siya maoy anak nga lalaki sa usa ka Alfeo ug usa ka maniningil ug buhis sa wala pa mahimong usa sa mga tinun-an ni Jesus. (Mat 10:3; Mar 2:14; tan-awa ang MANININGIL UG BUHIS.) Wala ibutyag sa Kasulatan kon si Levi may ngalan na ba nga Mateo sa wala pa mahimong tinun-an ni Jesus, nakadawat ba niining ngalana sa panahon nga siya nahimong tinun-an, o kaha gitawag ni Jesus nianang ngalana sa dihang siya gitudlo ingong usa ka apostol.

Mopatim-aw nga sa sayong bahin sa iyang ministeryo sa Galilea (30 o sayong bahin sa 31 K.P.) nga si Jesu-Kristo nagtawag kang Mateo gikan sa buhatan sa buhis didto o duol sa Capernaum. (Mat 9:​1, 9; Mar 2:​1, 13, 14) ‘Nagbiya sa tanang butang, si Mateo mitindog ug misunod kang Jesus.’ (Luc 5:​27, 28) Tingali aron saulogon ang pagdawat sa pagtawag kaniya nga mosunod kang Kristo, si Mateo “naghikay ug dakong kombira sa pag-abiabi,” nga gitambongan ni Jesus ug sa iyang mga tinun-an maingon man usab sa daghang maniningil ug buhis ug mga makasasala. Nakahasol kini sa mga Pariseo ug sa mga eskriba, mao nga sila nagbagulbol labot sa pagkaon ug pag-inom ni Kristo kauban sa mga maniningil ug buhis ug sa mga makasasala.​—Luc 5:​29, 30; Mat 9:​10, 11; Mar 2:​15, 16.

Sa ulahi, human sa Paskuwa sa 31 K.P., si Jesus nagpili sa 12 ka apostoles, ug si Mateo maoy usa kanila. (Mar 3:13-19; Luc 6:12-16) Bisan tuod ang Bibliya makadaghang naghisgot sa mga apostoles ingong usa ka grupo, wala na kini maghisgot pag-usab kang Mateo hangtod human sa pagkayab ni Kristo sa langit. Si Mateo nakakita sa nabanhawng si Jesu-Kristo (1Co 15:3-6), nakadawat ug panamilit nga mga instruksiyon gikan kaniya, ug nakakita kaniya nga mikayab ngadto sa langit. Human niini siya ug ang ubang mga apostoles mibalik sa Jerusalem. Ang mga apostoles miestar sa itaas nga lawak didto, ug si Mateo espesipikong ginganlan nga kauban nila, busa dayag nga usa siya sa mga 120 ka tinun-an nga nakadawat sa balaang espiritu sa adlaw sa Pentekostes 33 K.P.​—Buh 1:4-15; 2:1-4.