MATIAS

[lagmit pinamubo sa Heb. nga Matitias, nga nagkahulogang “Gasa ni Jehova”].

Ang tinun-an nga gipili pinaagig ripa nga maoy mopuli kang Judas Iskariote ingong apostol. Human mokayab si Jesus sa langit, si Pedro, kay nahibalong ang salmistang si David mitagna dili lamang sa pagtipas ni Judas (Sal 41:9) kondili misulat usab (Sal 109:8) nga “ang iyang katungdanan sa pagkamagtatan-aw ipakuha sa lain,” misugyot ngadto sa mga 120 ka tinun-an nga nagkatigom nga hulipan ang nabakanteng katungdanan. Si Jose nga Barsabas ug si Matias ang ilang giduso aron pilian; human sa pag-ampo, gihimo ang pagripa, ug si Matias ang napili. Nahitabo kini pipila ka adlaw lamang sa wala pa ang pagbubo sa balaang espiritu, ug kini ang kataposang hitabo nga gitaho sa Bibliya nga gihimo ang pagripa aron matino ang pinili ni Jehova.​—Buh 1:15-26.

Sumala sa mga pulong ni Pedro (Buh 1:​21, 22), si Matias nahimong sumusunod ni Kristo sa tibuok tulo-ug-tunga ka tuig nga ministeryo ni Jesus, suod nga nakig-uban sa mga apostoles, ug lagmit gayod nga usa sa 70 ka tinun-an o mga ebanghelisador nga gipadala ni Jesus sa pagsangyaw. (Luc 10:1) Human siya mapili, siya “giisip [sa kongregasyon] nga kauban sa napulog-usa ka apostoles” (Buh 1:26), ug human dayon niana sa dihang ang basahon sa Mga Buhat naghisgot bahin “sa mga apostoles” o sa “napulog-duha,” gilakip na si Matias.​—Buh 2:​37, 43; 4:​33, 36; 5:​12, 29; 6:​2, 6; 8:​1, 14; tan-awa ang PABLO.